वार्तादूत – डिजिटल न्युज नेटवर्क
लोहारा तालुक्यातील कानेगाव प्राथमिक आरोग्य केंद्र अंतर्गत येणारे लोहारा(खु) आरोग्य वर्धिनी केंद्र (उपकेंद्र) येथील १८ वर्षांवरील सर्व पात्र लाभार्थींना कोविड लसीचा पहिला डोस देण्याचे उद्दिष्ट शुक्रवारी ( दि. १९) पूर्ण करण्यात आले. त्यामुळे लोहारा (खु) उपकेंद्र १०० टक्के पात्र नागरिकांना कोविड लसीचा पहिला डोस देणारे तालुक्यातील दुसरे आरोग्य वर्धिनी केंद्र ठरले आहे.
लोहारा तालुक्यातील लोहारा (खु) आरोग्य वर्धिनी केंद्र अंतर्गत लोहारा (खु), मोघा(बु), मोघा(खु) या गावांचा समावेश होतो. येथील एकूण १८ वर्षांवरील नागरिकांची संख्या १७९८ असून सर्व पात्र लाभार्थींना लसीकरण करण्यात आले. लोहारा (खु) आरोग्य वर्धिनी केंद्रातील आरोग्य विभागातील टीम सदस्य समुदाय आरोग्य अधिकारी डॉ. दिपाली शिंदे, आरोग्य सेविका जी. एस. काळे, आरोग्यसेवक एस. आर. जवादे, अर्धवेळ परिचर छाया पवार, आशा स्वयंसेविका मनिषा इंगळे, जिजाबाई गोरे, पद्मिनी जाधव, अनिता बाबळे, लक्ष्मी रसाळ यांनी मिशन कवच कुंडल तर हर घर दस्तक अंतर्गत नियमित सत्र तसेच मोबाईल टीमद्वारे नागरिकांचे लसीकरण पूर्ण केले. लोहारा (खु) चे सरपंच सचिन रसाळ, ग्रामसेवक जी. डी. कोकाटे, पाणीपुरवठा विभागातील कर्मचारी रोहन जमादार यांनी घरोघरी आरोग्य विभागाच्या टीम सोबत फिरून लोकांना लस घेण्यासाठी प्रवृत्त केले. तसेच मोघा येथील सरपंच सचिन गोरे व ग्रामसेवक एम. व्ही. कदम यांचे सहकार्य लाभले.
प्राथमिक आरोग्य केंद्र कानेगाव येथील वैद्यकीय अधिकारी डॉ. प्रियंका बंदिछोडे यांनी मोबाईल टीम उपलब्ध करून देत क्षेत्रीय स्तरावर काम करणाऱ्या टीमला प्रोत्साहन दिले. तसेच स्पर्श ग्रामीण रुग्णालय येथील प्रकल्प अधिकारी रमाकांत जोशी यांनी त्यांची मोबाईल टीम पाठवून जनजागृती तसेच लसीकरण करत मोलाचा वाटा उचलला. याबरोबरच हॅलो मेडिकल फाऊंडेशन, एनएसई फाऊंडेशन या स्वयंसेवी संस्थांनीही लसीकरणाबाबत जनजागृती केली. दि. १९ नोव्हेंबर पर्यंत लोहारा तालुक्यातील एकूण आठ गावातील १०० टक्के पात्र लाभार्थींना लसीचा पहिला डोस देण्यात आला असून यात आरणी, नागराळ (लो), कास्ती खुर्द, बेंडकाळ, मोघा (बु), मोघा (खु), सालेगाव, लोहारा खुर्द या गावांचा समावेश आहे.
———-
लोहारा तालुक्यातील सर्व ग्रामपंचायत, स्वयंसेवी संस्था, प्रतिष्ठित नागरिक यांचा सक्रिय सहभाग मिळाला तर या महिनाअखेर तालुक्यातील पहिल्या डोसचे १०० टक्के लसीकरण पूर्ण होईल.
डॉ. अशोक कटारे,
तालुका आरोग्य अधिकारी,
