वार्तादूत – डिजिटल न्युज नेटवर्क
लोहारा तालुक्यातील १२ ग्रामपंचायत निवडणुकीसाठी रविवारी (दि. १८) मतदान होणार आहे. यासाठी निवडणुक विभागाने तयारी पूर्ण केली आहे.
लोहारा तालुक्यातील १३ ग्रामपंचायतीचा निवडणुक कार्यक्रम जाहीर झाला होता. परंतु नामनिर्देशन पत्र माघारी घेण्याच्या दिवशी वडगाव(गांजा) ग्रामपंचायत बिनविरोध निघाली. त्यामुळे लोहारा तालुक्यातील सास्तुर, जेवळी (उ), माकणी, नागुर, विलासपुर पांढरी, माळेगाव, उंडरगाव, तोरंबा, सालेगाव, हिप्परगा रवा, वडगाववाडी, अचलेर या १२ ग्रामपंचायतीच्या निवडणुकीसाठी रविवारी (दि. १८) मतदान होत आहे.
यासाठी लोहारा तहसिल कार्यालयाच्या निवडणूक विभागाने तयारी पूर्ण केली आहे. या निवडणुकीसाठी ४७ मतदान केंद्र राहणार आहेत. प्रत्येक मतदान केंद्रावर एक केंद्राध्यक्ष व तीन केंद्र अधिकारी राहणार असून एक पोलीस कर्मचारी व शिपाई राहणार आहेत. शनिवारी (दि.१७) दुपारी नियोजित सहा बसमधून सर्व मतदान यंत्रे त्या त्या मतदान केंद्रावर पाठविण्यात आली. यावेळी तहसीलदार संतोष रुईकर यांच्यासह निवडणूक विभागाचे कर्मचारी, मतदान केंद्रावरील अधिकारी उपस्थित होते. या निवडणुकीसाठी झोनल ऑफिसरचीही नियुक्ती करण्यात आली आहे. तसेच निवडणुकीच्या पार्श्वभूमीवर पोलीस प्रशासनाने आवश्यक ते कर्मचारी नियुक्त केले आहेत.
