वार्तादूत – डिजिटल न्युज नेटवर्क
देशात कोरोना विषाणूचा नवीन व्हेरिएन्ट BF7 संक्रमित झाल्यामुळे इंडियन मेडिकल असोसिएशनच्या नियमानुसार तुळजाभवानी मंदिर संस्थानातर्फे मास्क अनिवार्य करण्यात आले आहे. त्यामुळे महाराष्ट्राची कुलस्वामिनी, आई तुळजाभवानी देवीच्या मंदिरामध्ये येणाऱ्या सर्व भाविक, महंत, पुजारी आणि कर्मचाऱ्यांना मंदिर परिसरात मास्क सक्ती करण्यात आली आहे.
तुळजाभवानी देवीचा शाकंभरी नवरात्र उत्सव ३० डिसेंबर पासून घटस्थापनेने सुरुवात होत असल्याने भाविकांची गर्दी होण्याची शक्यता आहे. या पार्श्वभूमीवर मंदिर संस्थांनाचे अध्यक्ष तथा जिल्हाधिकारी डॉ. सचिन ओम्बासे यांनी याबाबत आदेश काढले आहेत.
जिल्हाधिकारी कार्यालयाकडून जनतेला केलेले आवाहन
उस्मानाबाद जिल्ह्यातील जनतेस याद्वारे कळविण्यात येते की, मा. सचिव, आरोग्य व कुटुंब कल्याण विभाग, भारत सरकार यांचे दि. 20 व 23 डिसेंबर 2022 रोजीच्या पत्रान्वये जपान, अमेरिका, कोरिया प्रजासत्ताक, ब्राझील व चीन या देशांमध्ये कोविड-19 विषाणूच्या झालेल्या प्रादुर्भावाच्या पार्श्वभूमीवर तसेच देशातील आगामी सणउत्सवांच्या पार्श्वभूमीवर देशामध्ये कोविड-19 चा प्रादुर्भाव होऊ नये याकरिता तात्काळ आवश्यक त्या खबरदारीच्या उपाययोजना करणेबाबत सूचना दिल्या आहेत. तसेच इंडियन मेडिकल असोसिएशन, नवी दिल्ली यांनी त्यांचे प्रसिद्धीपत्रक दि. 22 डिसेंबर 2022 अन्वये चीन या देशात आढळून आलेल्या कोविड-19 विषाणूच्या BF-7 या प्रकाराने बाधित झालेले चार रुग्ण देशात आढळून आले असल्याची माहिती प्रसिद्ध केली आहे.
या पार्श्वभूमीवर “प्रतिबंध हा उपचारापेक्षा अधिक चांगला” या तत्त्वानुसार उस्मानाबाद जिल्हयातील जनतेने घाबरून न जाता कोविड-19 चा प्रादुर्भाव होऊ नये याकरिता खालील नमूद बाबींचे पालन नागरिकांनी करावे असे आवाहन जिल्हाधिकारी तथा अध्यक्ष जिल्हा आपती व्यवस्थापन प्राधिकरण, उस्मानाबाद यांनी केले आहे.
1. सार्वजनिक ठिकाणी वावरताना नाक व तोंडावर मास्क लावावा.
2. गर्दीच्या ठिकाणी (जसे लग्नसमारंभ, राजकीय, धार्मिक, सामाजिक, सांस्कृतिक कार्यक्रम इ.) जाणे टाळावे.
3. सामाजिक अंतराचे पालन करावे. सार्वजनिक ठिकाणी व्यक्तींनी एकमेकांमध्ये कमीत कमी 6 फूट अंतर (2 गज की दूरी) ठेवावे.
4. आपले हात नियमितपणे साबण व पाण्याने धुवावेत अथवा सॅनिटायजरचा वापर करावा.
5. आंतरराष्ट्रीय प्रवास टाळावा.
6. ताप, खोकला, सर्दी, श्वास घेण्यास त्रास, जुलाब इ. लक्षणे आढळून आल्यास तात्काळ नजीकच्या दवाखान्यास भेट देऊन डॉक्टरांचा सल्ला घ्यावा.
7. कोविड-19 प्रतिबंधात्मक लसीकरण तात्काळ करुन घ्यावे.
8. सार्वजनिक ठिकाणी थुंकु नये.
9. नेहमी खोकताना, शिंकताना नाक व तोंड स्वच्छ रुमालाने /हात कोपरात दुमडून हाताने झाकून कोविड अनुरूप वर्तनाचे पालन करावे.
10. शासनाकडून व आरोग्य विभागाकडून वेळोवेळी देण्यात येणाऱ्या सूचनांचे पालन करावे.
