लोहारा तालुक्यातील सास्तुर येथील आशा गटप्रवर्तक संगिता क्षीरसागर यांना बुधवारी (दि.३१) सास्तुर ग्रामपंचायत कार्यालयात पुण्यश्लोक अहिल्यादेवी होळकर पुरस्कार देऊन गौरविण्यात आले.
प्राथमिक आरोग्य केंद्र माकणी अंतर्गत काम करणाऱ्या सास्तुर येथील आशा गटप्रवर्तक संगिता क्षीरसागर यांना महाराष्ट्र शासन महिला व बालविकास विभाग यांच्याकडून देण्यात येणारा ग्रामपंचायत स्तरीय पुण्यश्लोक अहिल्यादेवी होळकर पुरस्कार देण्यात आला. अहिल्यादेवी होळकर जयंतीदिनी बुधवारी (दि.३१) सास्तुर ग्रामपंचायत कार्यालयात सरपंच शितल राहुल पाटील यांच्या हस्ते हा पुरस्कार देण्यात आला. यावेळी उपसरपंच मिथुन कुर्ले, ग्रामसेवक डी. आय. गोरे यांच्यासह ग्रामपंचायत सदस्य, आशा कार्यकर्ती, कृषी सखी व ग्रामस्थ उपस्थित होते. संगिता क्षीरसागर व सीआरपी रेश्मा कादरी यांना ट्रॉफी व प्रमाणपत्र देऊन गौरविण्यात आले.
आशा गटप्रवर्तक संगिता क्षीरसागर या प्राथमिक आरोग्य केंद्र माकणी येथे आरोग्य विषयी काम करत आहेत. यामध्ये गावतील महिलांची आरोग्याची वेळोवेळी तपासणी करणे, गरोदर मातेची वेळोवेळी काळजी घेणे, आशाताईंना वेळोवेळी मार्गदर्शन करणे, ० ते ५ वर्ष लाभार्थीचे लासिकरण करून घेणे, कोविड – १९ च्या अनुषंगाने गावोगावी गृहभेटी देऊन १०० टक्के लसीकरण करणे, कोविडसारख्या परिस्थितीत लोकांची मनोबळ वाढविण्याचे कामे त्यांनी यशस्वीरित्या पार पाडले आहेत. त्यांच्या या कार्याची दखल घेऊन हा पुरस्कार देण्यात आला आहे. संगिता क्षीरसागर यांना हा पुरस्कार मिळाल्याबद्दल त्यांचे वडील निवृत्त शिक्षक किसनराव काटे यांनी कौतुक केले आहे.
