प्रभू श्रीराम मंदिर प्राणप्रतिष्ठा सोहळ्यानिमित्त लोहाऱ्यात उद्या विविध कार्यक्रम

रामजन्मभूमी अयोध्या या ठीकाणी प्रभू श्रीराम मंदिर प्राणप्रतिष्ठा सोहळ्यानिमित्त उद्या सोमवारी (दि.२२) लोहारा शहरात विविध कार्यक्रम, उपक्रम आयोजित करण्यात आले आहेत.
यानिमित्त सकाळी सहा वाजता कास्ती रोडच्या श्रीराम मंदीरात हरिहर भजनी मंडळ यांचा भजनाचा कार्यक्रम होणार आहे. त्यानंतर सकाळी ८ च्या सुमारास श्रीराम मंदिरापासून बाईक रॅली होणार आहे. महादेव मंदिर, वेशीतील हनुमान मंदिर, गणेश मंदिर, हनुमान मंदिर, जगदंबा मंदीर, शिवाजी महाराज चौक, डॉ. आंबेडकर चौक, हीप्परगा रोड, श्री जगदंबा मंदीर, शिवनगरमधील हनुमान मंदिर, तहसील रोड, विट्ठल रुक्मिणी मंदिर, श्रीदत्त मंदिर या मार्गे रॅली होणार असून भारतमाता मंदिर याठिकाणी रॅलीचा समारोप होणार आहे. राम मंदिरापासून शहरातील प्रमुख मार्गाने शोभायात्रा, मार्गावर रांगोळ्या, तसेच मंदिरामध्ये महाआरती, महाप्रसाद, मंदिरावर भगवे ध्वज लावणे, प्रवचन, कीर्तन आणि रात्री सात वाजता मंदिरामध्ये दिपोत्सव सोहळा असे कार्यक्रम होणार असल्याचे आयोजकांनी सांगितले आहे. यासाठी लोहाऱ्यातील सर्व रामभक्तानी मोठया संख्येने या आनंदोत्सवामध्ये सहभागी व्हावे असे आवाहन श्रीराम मंदिर प्राणप्रतिष्ठा सोहळा समिती मार्फत करण्यात आले आहे.