विद्यार्थ्यांमध्ये समानतेची भावना रुजविण्यासोबतच त्यांच्यात आत्मविश्वास आणि शाळेविषयी अभिमान निर्माण करण्याच्या उद्देशाने जिल्हा परिषद प्राथमिक शाळा, एकोंडी (लो) येथे नाविन्यपूर्ण शालेय गणवेश वाटपाचा उपक्रम राबविण्यात आला. या उपक्रमांतर्गत शाळेतील सर्व मुला-मुलींना पँट, शर्ट आणि ब्लेझर यांचा समावेश असलेले आकर्षक गणवेश मोफत वितरित करण्यात आले.
विद्यार्थ्यांना पँट-शर्टसह ब्लेझर देण्याचा हा उपक्रम परिसरातील शैक्षणिक क्षेत्रात लक्षवेधी ठरत आहे. जिल्ह्यात अशा स्वरूपाचा उपक्रम कोणत्याच जिल्हा परिषद शाळेत नसेल. अशा पद्धतीने या गणवेश वाटपाचे वेगळेपण अधोरेखित होत आहे. शाळेचे मुख्याध्यापक देवेंद्र आयलाने व शिक्षक वनराज सूर्यवंशी, प्रदीपकुमार गुडले, प्रतिभा येदले व सुश्मिता मलकलपट्टे या सर्व शिक्षकांनी एकत्रितपणे पुढाकार घेत आपल्या सहकार्यातून विद्यार्थ्यांना हे गणवेश मोफत उपलब्ध करून दिले. या उपक्रमासाठी जवळपास १ लाख १५ हजार रुपये किमतीचे गणवेश वितरित करण्यात आल्याचे मुख्याध्यापक देवेंद्र आयलाने यांनी सांगितले. शिक्षकांनी केवळ अध्यापनाची जबाबदारी न पार पाडता विद्यार्थ्यांच्या सर्वांगीण विकासासाठी दाखविलेली ही सामाजिक बांधिलकी कौतुकास्पद आहे.
या उपक्रमामुळे विद्यार्थ्यांना आकर्षक गणवेश मिळण्याबरोबरच त्यांच्यात एकसमानतेची भावना, शिस्त, आत्मविश्वास आणि शाळेविषयी आपलेपणा वाढण्यास मदत होणार आहे. शिक्षकांच्या एकजुटीने आणि सकारात्मक दृष्टिकोनातून राबविलेला हा उपक्रम इतर शाळांसाठीही प्रेरणादायी ठरू शकतो. या नाविन्यपूर्ण गणवेशामुळे विद्यार्थी व पालक यांच्यामध्ये आनंदाचे वातावरण निर्माण झाले आहे. या आकर्षक गणवेशामुळे विद्यार्थी हे इंटरनॅशनल स्कूल सारखे दिसत आहेत. विद्यार्थ्यांच्या चेहऱ्यावर आनंद फुलविणारा आणि शिक्षणाप्रती सकारात्मक वातावरण निर्माण करणारा हा उपक्रम म्हणजे मुख्याध्यापक व शिक्षकांच्या सेवाभावी वृत्तीचा आणि विद्यार्थ्यांप्रती असलेल्या जिव्हाळ्याचा आदर्श नमुना आहे.
याबद्दल मुख्याध्यापक देवेंद्र आयलाने व शिक्षक वनराज सूर्यवंशी, प्रदीपकुमार गुडले, प्रतिभा येदले व सुश्मिता मलकलपट्टे यांचे गटशिक्षणाधिकारी शिवकुमार बिराजदार, केंद्रप्रमुख मोहन अगंबरे, शाळा व्यवस्थापन समिती अध्यक्ष बालाजी जाधव, उपाध्यक्ष प्रवीण पाटील, सर्व सदस्य, एकोंडी (लो) गावच्या सरपंच सुलक्षणाताई सूर्यवंशी, उपसरपंच विकास पाटील, गावातील शिक्षण प्रेमी नागरिक यांनी सर्व शिक्षकांचे कौतुक करून शुभेच्छा दिल्या.
सध्या मुलांनी परिधान केलेला ‘कोट, टाय आणि पॅन्ट’ हा नवीन गणवेश विद्यार्थ्यांवर अत्यंत छान दिसतो. यामुळे मुलांमध्ये अभ्यासासोबतच एक वेगळी शिस्त आणि संस्कार निर्माण होत आहेत. आपल्या जिल्हा परिषदेच्या शाळेतील मुले कोणत्याही खाजगी किंवा इंग्लिश स्कूलच्या मुलांपेक्षा कमी नाहीत, यामुळे आपल्या शाळेची प्रतिमा अधिक उंचावेल आणि सर्वांना या गोष्टीचा सार्थ अभिमान वाटेल.
देवेंद्र आयलाने,
मुख्याध्यापक
