सास्तुर येथील स्पर्श रुग्णालयात मोफत दिव्यांग (अपंगत्व) शस्त्रक्रिया शिबीर

लोहारा (Lohara) तालुक्यातील सास्तुर (sastur) येथील स्पर्श रुग्णालयात दि. १९ व २० ऑक्टोबर रोजी दिव्यांग (अपंगत्व) निवारण शस्त्रक्रिया शिबिराचे ( Divyang (Disability) Surgery Camp) आयोजन करण्यात आले आहे. दरवर्षी प्रमाणे यावर्षीही लंडन व मुंबई येथील अस्थिरोग तज्ञ, डॉक्टर या शस्त्रक्रिया शिबिरासाठी येणार आहेत. त्यामुळे परिसरातील जास्तीत जास्त बालकांनी या शिबिराचा लाभ घ्यावा असे आवाहन करण्यात आले आहे.
तालुक्यातील सास्तुर येथील स्पर्श रुग्णालयात दरवर्षी या शिबिराचे आयोजन करण्यात येते. आतापर्यंत १५ शिबिरामध्ये जवळपास १५०० च्या वर बालकांच्या यशस्वी शस्त्रक्रिया करण्यात आल्या आहेत. जी बालके उठून उभी राहू शकत नव्हती, चालू शकत नव्हती अशी बालके कोणाच्याही आधारा शिवाय या मोफत शस्त्रक्रियेनंतर चालू, फिरू, पळू शकतात. १४ वर्षा पर्यंतच्या कुठल्याही जिल्ह्यातील बालकांना या दिव्यांग निवारण शस्त्रक्रियेचा लाभ घेता येईल. या शिबिरासाठी नाव नोंदणी चालू आहे. खालील दिलेल्या मोबाईल नंबरवर नाव नोंदणी करता येईल. किंवा दूर राहणाऱ्या बालकांना शिबिरा दिवशी १९ तारखेला सकाळ ९.३० वा. पर्यंत येऊन तपासणी करून गरजेनुसार शस्त्रक्रिया करण्यात येणार आहेत. दि. १९ रोजी येणाऱ्या बालकांना त्यांच्या पालकांनी चहा/दुध, बिस्कीट खाऊ घालून घेऊन यावे. लंडन इंग्लंड येथील जगप्रसिद्ध अस्थिरोग तज्ञ डॉ. जॉन क्लेग यांनी सेवाभावी वृत्तीने आतापर्यंत अनेक बालकांवर अस्थी व्यंग शस्त्रक्रिया करून त्यांना समाजाच्या प्रवाहात येण्यास मदत केली आहे. या शिबिरासाठी ९८९०४०२५७८, ९८२३३२१८९२, ९५९५१४३१२७, ८८०५५५७११७ या मोबाईल नंबर वर संपर्क साधून जास्तीत जास्त बालकांनी या शिबिराचा लाभ घ्यावा असे आवाहन स्पर्श रुग्णालयाचे प्रकल्प अधिकारी रमाकांत जोशी यांनी केले आहे.