लोहारा तालुक्यातील उंडरगाव येथे ग्रामदैवत श्री हनुमान जयंती (Hanuman Jayanti) निमित्त दरवर्षी प्रमाणे याही वर्षी पाच दिवसीय भव्य यात्रा महोत्सव आयोजित करण्यात आला आहे.
तालुक्यातील उंडरगाव येथे पुरातन हनुमान मंदिर आहे. या मंदिरातील मूर्ती दक्षिणमुखी आहे. या ठिकाणी दरवर्षी हनुमान जयंतीनिमित्त विविध कार्यक्रमांचे आयोजन करण्यात येते. याही वर्षी या कार्यक्रमाचे आयोजन करण्यात आले आहे. दि. २२ ते २६ एप्रिल या कालावधीत हा यात्रा महोत्सव पार पडणार आहे. सोमवार दि. २२ एप्रिल रोजी उंडरगाव येथील हनुमान मंदिरात रात्री नऊ वाजता वेदांत संगीत विद्यालय लातूर यांचा संगीत रजनी कार्यक्रम होणार आहे. मंगळवारी (दि.२३) हनुमान जन्मोत्सवा निमित्त सकाळी सहा वाजता गुलाल उधळणे, दुपारी चार वाजता महाप्रसाद, रात्री नऊ वाजता शिवकीर्तनकार हभप गजानन महाराज बाव्हळ गुरुजी पुणे यांचे हरिकीर्तन होणार आहे. बुधवारी (दि.२४) सकाळी पालखी व कावड मिरवणूक काढण्यात येणार आहे. त्यानंतर भारुडाचा कार्यक्रम आयोजित करण्यात आला आहे. दुपारी चार वाजता महाप्रसाद होणार आहे. त्यानंतर रात्री नऊ वाजता शिवशाहीर बाळासाहेब काळजे यांचा ‘ही दौलत महाराष्ट्राची’ हा कार्यक्रम होणार आहे. गुरुवारी (दि.२५) सकाळी नऊ वाजता हनुमान यात्रा लिलाव होणार आहे. त्यानंतर दुपारी दोन वाजता महाप्रसाद होणार आहे. दुपारी चार वाजता कुस्त्या होणार आहेत. रात्री नऊ वाजता नाटक होणार आहे. शुक्रवारी (दि.२६) रात्री नऊ वाजता ‘गावरान मैना’ हा ऑर्केस्ट्रा होणार आहे. या सर्व कार्यक्रमाचा परिसरातील ग्रामस्थांनी लाभ घ्यावा असे आवाहन उंडरगाव ग्रामस्थांनी केले आहे.
