लोहारा (lohara) तालुक्यातील भातागळी (bhatagali) येथील मानाच्या काठीचे शुक्रवारी (दि. १२) शिखर शिंगणापूरकडे (shinganapur) प्रस्थान झाले. हजारो भाविकासह कटल्या, नंदी, कावड इत्यादींच्या सोबत ही काठी शिखर शिंगणापूरकडे रवाना झाली. यावेळी भातागळी ग्रामस्थांनी काठीसोबत जाणाऱ्या भाविकांना गावाबाहेर येत निरोप दिला.
तालुक्यातील भातागळी ते शिखर शिंगणापूर हे अंतर पार करत १७ एप्रिल रोजी सायंकाळी ही काठी शिखर शिंगणापूर मध्ये पोहोचेल. शिखर शिंगणापूर येथील महादेवाच्या (mahadev) मुख्य मंदिरात काठीचा विवाह सोहळा संपन्न होतो. धार्मिक विधीही होतात. शिखर शिंगणापूरमध्ये भातागळीच्या महादेवाच्या काठीला विशेष असा मान आहे. भातागळीची काठी ही शंभू महादेवाची अर्धांगिनी अर्थात पार्वतीचे रूप मानले जाते. भातागळी गावामध्ये गुढीपाडव्याच्या दिवशी या काठीला अर्थात नवरीला सजवले जाते. तिची मनो भावे पूजा केली जाते. भातागळी गावात एकाही घरावरती गुढी न उभारता काठी हीच सार्वजनिक गुढी उभी केली जाते. पाडव्यानंतर तीन दिवस काठी महादेवाच्या मंदिरामध्ये उभी असते. परिसरातील व गावातील नागरिक दररोज मनोभावे पूजा अर्चा, भजन, करतात तसेच दररोज संध्याकाळी काठीची प्रत्येक समाजाकडून आरती केली जाते.
काठी शिखर शिंगणापूरमध्ये पोहोचल्यानंतर एक दिवस मुक्कामी राहते. तसेच परतीचा प्रवासही सहा दिवसाचा असतो. यावर्षी ही काठी भातागळी गावांमध्ये २४ एप्रिल रोजी येणार आहे. त्यानंतर भातागळी गावच्या यात्रेला प्रारंभ होतो. दि. २५ व २६ एप्रिल रोजी ही यात्रा भरते. यावर्षी दि. २५ व २६ एप्रिलला भातागळी फेस्टिवल अंतर्गत राज्यस्तरीय नृत्य स्पर्धेचे आयोजन करण्यात आले असून राज्यातील विविध मान्यवरांना निमंत्रित करण्यात आले आहे. तसेच या दरम्यान बैलगाडा (bailgada) शर्यतीचेही आयोजन करण्यात आले आहे.
