वार्तादूत – डिजिटल न्युज नेटवर्क
लोहारा तालुक्यातील तोरंबा येथे शिवजयंतीनिमित्त विविध कार्यक्रमांचे आयोजन करून अनोख्या पद्धतीने शिवजयंती साजरी करण्यात आली.
तालुक्यातील तोरंबा येथील दिलालपूरचा राजा प्रतिष्ठानच्या वतीने या शिवजन्मोत्सव सोहळ्याचे आयोजन करण्यात आले होते. या सोहळ्यास दि. १७ फेब्रुवारी ला ह.भ.प.अविनाश महाराज भारती यांच्या किर्तनाने सुरुवात झाली. त्यानंतर दि. १८ रोजी ह.भ.प.प्रल्हाद महाराज सरडे यांचे कीर्तन झाले.दि. १९ फेब्रुवारीला सकाळी महेश महाराज माकणीकर यांच्या उपस्थितीत शिवरायांचा पाळणा कार्यक्रम पार पडला. 
त्यानंतर दिवसभर महाप्रसादाचे आयोजन करण्यात आले होते. शिवराय मनामनात, शिवजयंती घराघरात या संकल्पनेतून घरोघरी शिवजयंतीच्या डेकोरेशनची स्पर्धा आयोजित करण्यात आली होती. या स्पर्धेत गायत्री सुरेंद्र चव्हाण प्रथम, हर्षवर्धन मारोती ढोणे द्वितीय तर रिया रविंद्र रणखांब यांनी तृतीय क्रमांक पटकावला. तसेच वारकऱ्यांच्या उपस्थितीत व टाळाच्या गजरात दैदीप्यमान दिंडी सोहळ्यातून शिवरायांच्या मूर्तीची मिरवणूक काढण्यात आली. या कार्यक्रमासाठी ग्रामस्थ मोठ्या संख्येने उपस्थित होते.
