वार्तादूत – डिजिटल न्युज नेटवर्क
“परिवर्तन फौंडेशन” आयोजित ‘परिवर्तन महोत्सव – २०२२” (पर्व-९) जल्लोषात साजरे करण्यात आले. या कार्यक्रमाच्या अध्यक्षस्थानी बेंबळी पोलीस स्टेशनचे सहाय्यक पोलीस निरीक्षक मच्छिंद्र शेंडगे हे होते. तर सुप्रसिद्ध मिमिक्री कलाकार योगेश सुपेकर यांची प्रमुख उपस्थिती होती. यावेळी नंदकुमार माळी श्रीमती प्रणिता क्षिरसागर, अनंत आदटराव, रवी आदटराव, जयंत आदटराव, तात्याराव शिंदे, बालाजी सुरवसे, भुजंग पाटील, लक्ष्मण शिंदे, बालाजी लोखंडे आदी मान्यवरांच्या उपस्थितीत परिवर्तन परिवाराचे कार्यकर्ते शंकर वैरागकर यांचे दोन महिन्यापूर्वी आकस्मिक निधन झाले होते, त्यांना आदरांजली वाहून कार्यक्रमाची सुरुवात झाली.
करजखेडा खंडोबा यात्रेच्या निमित्ताने परिवर्तन महोत्सव हा सांस्कृतिक कार्यक्रम गेल्या ९ वर्षापासून आयोजीत केला जातो. या कार्यक्रमाच्या माध्यमातून यात्रेसाठी आलेल्या भाविक भक्तांचे, ग्रामस्थांचे मनोरंजन, प्रबोधन व लोकशिक्षण करत असतानाच गावात चांगले काम केलेल्या लोकांच्या पाठीवर कौतुकाची थाप या कार्यक्रमाच्या माध्यमातून दिली जाते. या कार्यक्रमाचे प्रास्ताविक रवी आदटराव यांनी केले. तसेच शेतकऱ्यांनी आपले उत्पन्न कसे वाढवावे याविषयी गणेश आदटराव यांनी मार्गदर्शन केले.
सिनेकलाकार योगेश सुपेकर यांनी एकपात्री प्रयोगासह अनेक राजकीय नेत्यांचे आवाज काढून उपस्थितांचे मनोरंजन केले. सहभागी कलाकारांच्या कलाविष्काराने उपस्थितांचे मनोरंजन व प्रबोधन झाले. त्यानंतर लावणी, लघुनाटिका, भारुड पोवाडे इ. सादरीकरणाने कार्यक्रमाची सांगता झाली. प्राची जाधव, प्रांजली जाधव, अनामिका अहिरे, श्वेता अवसरमोल, आशिष थोरात, शाहीर व्यवहारे या कलाकारांनी रंगत आणली. कार्यक्रमाचे सूत्रसंचालन अच्युत आदटराव व शाहूराज दबडे यांनी केले.
उद्धव कळसुले यांनी आभार मानले. कार्यक्रम यशस्वी करण्यासाठी परिवर्तन फौंडेशनचे अनिल दुधभाते, तुकाराम सुरवसे, लखन पवार, अमृत सुरवसे, बालाजी देवकर, लक्ष्मण बनकर, भैरवनाथ म्हेत्रे, अजित कंदले, अनिल आदटराव, कपिल चव्हाण, दयानंद वाघे, हनुमंत आदटराव, रमेश आदटराव, माऊली पांचाळ, रामेश्वर वेळापुरे, तुकाराम आदटराव, अमोल चव्हाण यांच्यासह सर्व सदस्यांनी परिश्रम घेतले.
