वार्तादूत – डिजिटल न्युज नेटवर्क
उमेद-महाराष्ट्र राज्य ग्रामीण जीवनोन्नती अभियान अंर्तगत तालुका अभियान व्यवस्थापन कक्ष पंचायत समिती लोहारा व महाराष्ट्र ग्रामीण बँक शाखा सास्तुर यांच्या संयुक्त विद्यमाने तालुक्यातील सास्तुर येथील उमेद अंतर्गत स्थापन झालेल्या १४ महिला स्वयंसहाय्यता गटांना महाराष्ट्र ग्रामीण बँक शाखा सास्तुर यांच्या वतीने १६ लाख रुपये बँक कर्ज वाटप करण्यात आले.
गुरुवारी ( दि. २५) लोहारा पंचायत समिती येथे जिल्हा परिषदेचे मुख्य कार्यकारी अधिकारी डॉ. विजयकुमार फड यांच्या प्रमुख उपस्थितीत हा कर्जवाटप मेळावा घेण्यात आला. यावेळी अतिरिक्त मुख्य कार्यकारी अधिकारी अनिलकुमार नवाळे, उपमुख्य कार्यकारी अधिकारी, श्री. नितिन दाताळ, उपविभागीय अधिकारी विठल उदमिले, गटविकास अधिकारी सोपान अकेले, महाराष्ट्र ग्रामीण बँक सास्तुर चे शाखा व्यवस्थापक सचिन डाके यांची उपस्थिती होती. महिला स्वयंमपूर्ण झाल्या आहेत व त्या आर्थिकदृष्ट्या सक्षम होणे आवश्यक आहे. सदर कर्जाच्या माध्यमातून महिलांनी जास्तीत जास्त शाश्वत उपजीविकेची साधने उभी करावीत व आपल्या आर्थिक उत्पन्नात वाढ करावी जेणे करून बँक कर्जाची वेळेत परतफेड करता येईल. या कार्यक्रमामध्ये मुख्य कार्यकारी अधिकारी विजयकुमार फड यांचे हस्ते उपस्थित गटातील सदस्यांना कर्ज वाटप करण्यात आले. यावेळी महिलांनी कर्जाचा योग्य प्रकारे विनियोग करावा, यातुन नवीन व्यवसाय उभे करून बँकेच्या कर्जाची वेळेत परतफेड करावी असे आवाहन मुख्य कार्यकारी अधिकारी डॉ. विजयकुमार फड यांनी केले.
या कार्यक्रमासाठी पंचायत समिती अंतर्गत सर्व विभागाचे अधिकारी, कर्मचारी उपस्थित होते. हा कार्यक्रम यशस्वी करण्यासाठी तालुका अभियान व्यवस्थापक अमोल कासार, तालुका व्यवस्थापक प्रणिता कटकदौंड, प्रभाग समन्वयक प्रीतम बनसोडे, बँक सखी मालन कांबळे, सीआरपी रेशमा कादरी यांच्यासह उमेदच्या सर्व कर्मचाऱ्यांनी परिश्रम घेतले.
