लोहारा (Lohara) तालुक्यातील नागराळ येथील युवकांनी शिवजयंती (Shivjayanti) निमित्त नागराळ ते लोहारा रॅली काढली होती. या रॅलीत ग्रामस्थ, महिला, युवक मोठ्या संख्येने सहभागी झाले होते.
तालुक्यातील नागराळ येथील युवकांनी बुधवारी (दि.१९) शिवजयंती निमित्त भव्य रॅली काढली होती. या रॅलीत ट्रॅक्टरवर छत्रपती शिवाजी महाराज, राजमाता जिजाऊ, छत्रपती संभाजी महाराज यांच्या प्रतिमा ठेवून त्यांना आकर्षक पद्धतीने सजावट केली होती. यावेळी बाल चिमुकल्यांनी केलेले लेझीम नृत्याने उपस्थितांची मने जिंकली. यावेळी उपस्थितांनी दिलेल्या घोषणांनी परिसर दुमदुमून गेला होता. ही रॅली शहरातील जगदंबा मंदिर, डॉ. बाबासाहेब आंबेडकर चौक, छत्रपती शिवाजी महाराज चौक, बसस्थानक पर्यंत जाऊन परत याच मार्गे नागराळ पर्यंत काढण्यात आली. ही रॅली छत्रपती शिवाजी महाराज चौकात आल्यावर लोहारा शहर मध्यवर्ती शिवजयंती समितीच्या वतीने रॅलीचे स्वागत करून छत्रपती शिवाजी महाराज यांच्या प्रतिमेचे पूजन करण्यात आले. या अनोख्या रॅलीने लोहारा शहरवासीयांचे लक्ष वेधून घेतले.
