कष्टाला जर जिद्दीची आणि योग्य मार्गदर्शनाची जोड मिळाली, तर यशाचे शिखर नक्कीच गाठता येते हे एका विद्यार्थ्याने सिद्ध करून दाखवले आहे.
लोहारा शहरातील नेताजी सुभाषचंद्र बोस महाविद्यालयात प्राध्यापक म्हणून कार्यरत प्रशांत काळे यांचा मुलगा सौरभ काळे याने थेट अमेरिकेत आपल्या बुद्धिमत्तेची चुणूक दाखवत ७५ लाख रुपयांचे इंटर्नशिप पॅकेज मिळवले आहे. सौरभचे प्राथमिक शिक्षण लातूर आणि उच्च शिक्षण पुण्यात झाले. लहानपणापासूनच अभ्यासात हुशार असलेल्या सौरभने इंजिनिअरिंगसाठी कॉलेज ऑफ इंजिनिअरिंग पुणे (सीओईपी) सारख्या नावाजलेल्या संस्थेत प्रवेश मिळवला. तिथल्या शैक्षणिक शिस्तीत आणि तांत्रिक अनुभवातून त्याने आपले कौशल्य विकसित केले. पदवीचे शिक्षण पूर्ण केल्यानंतर, उच्च शिक्षणाचे स्वप्न उराशी बाळगून त्याने अमेरिकेतील “ड्युक” या नामांकित विद्यापीठात प्रवेश घेतला. तेथे एमईएम या मास्टर्स डिग्रीचा तो सध्या अभ्यास पूर्ण करत आहे. परदेशात शिक्षण घेत असताना केवळ अभ्यासावर लक्ष केंद्रित न करता, सौरभने तंत्रज्ञान क्षेत्रातील नवनवीन बदलांचा अभ्यास केला. त्याच्या याच कौशल्यामुळे टेस्ला या जागतिक दर्जाच्या कंपनीने त्याला इंटर्नशिपची संधी दिली. विशेष म्हणजे, एका शिकाऊ विद्यार्थ्याला (इंटर्नशिप) ७५ लाख रुपयांचे मानधन मिळणे ही एक दुर्मिळ आणि मोठी घटना मानली जात आहे. त्याच्या या यशामुळे केवळ त्याच्या कुटुंबाचेच नव्हे, तर संपूर्ण महाराष्ट्राचे नाव उंचावले आहे.
सौरभचे वडील प्रशांत काळे हे लोहारा येथील नेताजी सुभाषचंद्र बोस कनिष्ठ महाविद्यालयात इंग्लिश विषयाचे प्राध्यापक आहेत. तर आई श्रीमती रेश्मा प्रशांत काळे या लातूर येथील लाहोटी शाळेत शिक्षीका म्हणून कार्यरत आहेत. घरातूनच शिक्षणाचे बाळकडू मिळाल्याने आणि वडिलांनी दिलेल्या शिस्तीमुळे सौरभने हे यश संपादन केले आहे. परदेशात जाऊन मिळवलेले हे यश इतर अनेक विद्यार्थ्यांसाठी प्रेरणादायी ठरणार आहे. सौरभचे हे यश सांगते की, भारतीय शिक्षण पद्धती आणि विशेषतः महाराष्ट्रातील शैक्षणिक संस्थांमधून शिकलेले विद्यार्थी जागतिक स्तरावर कोणत्याही स्पर्धेत टिकू शकतात. “स्वप्न मोठी पहा आणि ती पूर्ण करण्यासाठी सातत्य ठेवा,” असाच संदेश सौरभच्या या यशातून मिळतो.
सौरभच्या या देदीप्यमान यशाबद्दल त्याचे सर्व स्तरांतून अभिनंदन केले जात आहे. सौरभच्या या यशामागे त्याच्या आई वडिलांचे खूप मोठे श्रेय आहे. त्याच्या आई वडिलांनी त्यांच्या जीवनात खूप मोठा संघर्ष केला आहे. त्यामुळे सौरभने मिळवलेल्या या उत्तुंग यशाबद्दल त्याचे वडील प्रा. प्रशांत काळे व आई रेश्मा काळे यांचेही अभिनंदन केले जात आहे.
