आषाढी एकादशी निमित्त कानेगाव येथे भाविकांची गर्दी

प्रति पंढरपूर म्हणुन ओळख असलेल्या व लाखो वारकरी, भाविक भक्तांचे श्रद्धास्थान असलेल्या श्री क्षेत्र कानेगाव मध्ये आषाढी वारीच्या निमित्त शनिवारी (दि. २५) श्री संत शिरोमणी सद्गुरू मारुती महाराज कानेगावकर यांच्या समाधीचे दर्शन घेण्यासाठी भाविकांनी मोठ्या प्रमाणात गर्दी केली होती. यावेळी भाविकांच्या उपस्थितीमुळे परिसरात भक्तीमय वातावरण झाले होते.
प्रति पंढरपूर म्हणून ओळखल्या जाणाऱ्या लोहारा तालुक्यातील कानेगाव येथे दरवर्षी आषाढी एकादशीच्या दिवशी विविध धार्मिक कार्यक्रम होत असतात. आषाढी एकादशी, कार्तिकी, माघवारी यासह मारूती महाराजांच्या पुण्यतिथी सोहळ्याला कानेगाव येथे भक्तांची दर्शनासाठी गर्दी होते. कानेगाव येथील संत शिरोमणी मारूती महाराज हे विठ्ठलाचे भक्त होते. कानेगाव येथे संत मारुती महाराजांचे समाधीस्थळ असून याठिकाणी मंदिर उभारण्यात आले

आहे. आषाढी एकादशी निमित्त कानेगाव येथे संत मारूती महाराजांच्या समाधी स्थळाचे दर्शन घेण्यासाठी आषाढी एकादशी दिवशी शनिवारी (दि.२५) पहाटेपासूनच भक्तांची रांग लागली होती. यावेळी विविध कार्यक्रमांचे आयोजन करण्यात आले होते. पहाटे मंदिरात महापूजा करण्यात आली. यावेळी टाळ मृदंगाच्या गजरात गावातून पालखीची मिरवणूक काढण्यात आली. त्यानंतर मंदिर परिसरात रिंगण सोहळा पार पडला. लोहारा तालुक्यातील अनेक गावांतून कानेगावकडे पायी निघालेल्या शेकडो दिंड्या दुपारी दाखल झाल्या. याठिकाणी समाधीस्थळाचे दर्शन घेण्यासाठी भाविक भक्त मोठ्या संख्येने उपस्थित होते. यानिमित्त कानेगावचे नागरिक हरिश्चंद्र निवृत्ती कदम यांच्या तर्फे सर्व भाविक भक्तांना फराळाचे वाटप करण्यात आले. यावेळी आमदार प्रवीण स्वामी यांनीही समाधी स्थळाचे दर्शन घेऊन वारकरी यांच्या समवेत फुगडी वर ठेका धरला.
यावेळी गावातील विनायक कदम, पांडुरंग लोभे, बालाजी कदम, कुमार कुलकर्णी, ज्ञानदेव कदम, नारायण कदम गुरुजी यांच्यासह कानेगाव प्राथमिक आरोग्य केंद्र कानेगावचे सर्व कर्मचारी, लोहारा पोलीस स्टेशनचे पोलीस अधिकारी, महावितरणचे कर्मचारी, ग्रामपंचायत कार्यालय कानेगाव व सर्व कानेगाव ग्रामस्थ, युवक व वारकरी भाविक भक्तांनी परिश्रम घेतले.