लोहारा तालुक्यातील होळी येथील जिल्हा परिषद शाळेत विद्यार्थ्यांसाठी मोफत बाल आरोग्य तपासणी शिबिराचे आयोजन करण्यात आले.
या शिबिराच्या अध्यक्षस्थानी शालेय व्यवस्थापन समितीचे अध्यक्ष अनिल गायकवाड होते. यावेळी शालेय व्यवस्थापन समितीचे उपाध्यक्ष विनोद गायकवाड, सरपंच सरोजा ओम बिराजदार, प्रतिमा जाधव, गोविंद जाधव, जनार्धन जाधव, राम जाधव, युवराज कोकाटे, संजय पाटील, धनराज जाधव, प्रा. गोविंद जाधव, प्रा. विनोद जाधव, बाबा बिराजदार, प्रदीप मोरे, संदीप मोरे, करण बाबळसुरे, तसेच सहशिक्षक गोविंद जाधव, योगराज संगमेश्वर मठपती, माधुरी कुलकर्णी यांच्यासह ग्रामस्थ उपस्थित होते. तालुक्यातील होळी
येथील डॉ. रणजीत विनोद जाधव यांच्या आईचे ११ ऑगस्ट रोजी हृदयविकाराने निधन झाले होते. त्यांच्या मातोश्रींच्या स्मृतिप्रीत्यर्थ विद्यार्थ्यांसाठी हे मोफत बाल आरोग्य तपासणी शिबिराचे आयोजन करण्यात आले. या शिबिरात १२० विद्यार्थ्यांची संपूर्ण आरोग्य तपासणी करून आवश्यकतेनुसार टॉनिक, टॅबलेट व इतर औषधोपचार करण्यात आले. उपस्थित सर्व विद्यार्थ्यांना फळांचे वाटप करण्यात आले. गोविंद जाधव यांनी प्रास्ताविक केले. मनस्वामी यांनी सूत्रसंचालन केले. आपल्या आईच्या निधनानंतर होणारा अनावश्यक खर्च टाळून आपल्याच गावातील शाळेच्या विद्यार्थ्यांच्या आरोग्याची काळजी घेत सामाजिक बांधिलकीतून आयोजित केलेल्या या उपक्रमाबद्दल मुख्याध्यापक देविदास पावशेरे यांनी डॉ. रणजीत जाधव व जाधव कुटुंबीयांचे आभार मानले.
