लोहारा (बु) नगरपंचायतची मुदत संपल्याने उपविभागीय अधिकारी विठ्ठल उदमले घेणार प्रशासक म्हणून पदभार

वार्तादूत – डिजिटल न्युज नेटवर्क
लोहारा (बु) नगरपंचायतची मुदत संपल्याने उमरगा उपविभागीय अधिकारी यांना प्रशासक म्हणून नियुक्ती करण्यात आल्याचा आदेश जिल्हाधिकारी यांच्याकडून काढण्यात आला आहे. त्यानुसार उपविभागीय अधिकारी विठ्ठल उदमले हे शुक्रवारी (दि. ७) लोहारा नगरपंचायतचा पदभार स्वीकारणार आहेत.
जिल्हाधिकारी कार्यालयाकडून काढण्यात आलेल्या या आदेशात म्हणले आहे की, महाराष्ट्र नगरपरिषदा, नगरपंचायती, औद्योगिक नगरी अधिनियम १९६५ चे कलम ४० (१) नुसार नगरपंचायतची मुदत ही पहिल्या सभेसाठी नेमून दिलेल्या तारखेपासून पाच वर्षांच्या मुदती पर्यंत चालू राहील असे नमूद आहे. त्यानुसार लोहारा (बु) नगरपंचायतची मुदत ही दि. ६ मे २०२१ रोजी संपत आहे. त्यामुळे उपविभागीय अधिकारी उमरगा यांची प्रशासक म्हणून नियुक्ती करण्यात येत असल्याचे या आदेशात नमूद करण्यात आले आहे. त्यानुसार शुक्रवारी (दि. ७) उपविभागीय अधिकारी विठ्ठल उदमले हे नगरपंचायत च्या प्रशासक पदाचा पदभार स्वीकारतील. लोहारा (बु) नगरपंचायतची मुदत संपत आल्याने सार्वत्रिक निवडणुकीच्या अनुषंगाने प्रभाग रचना, आरक्षण सोडत, प्रारूप मतदार यादी प्रसिद्धी करून त्यावर हरकती व सूचना मागविणे आदी कार्यक्रम झाले आहेत. परंतु सध्याच्या कोरोनाच्या परिस्थितीमुळे ही सार्वत्रिक निवडणूक लांबणीवर पडली आहे.