वार्तादूत – डिजिटल न्युज नेटवर्क
लोहारा येथील सार्वजनिक बांधकाम उपविभाग कार्यालयातील उपविभागीय अभियंता पद कायम स्वरूपी रुजू करावे व तालुक्यातील अनेक अपघाती वळण असलेल्या ठिकाणी तात्काळ फलक लावण्यात यावेत अशी मागणी लोहारा तालुका संभाजी ब्रिगेड च्या वतीने तहसीलदार मार्फत जिल्हाधिकारी यांच्याकडे निवेदनाद्वारे करण्यात आली आहे. सोमवारी ( दि.९) नायब तहसिलदार रणजित शिराळकर यांना हे निवेदन देण्यात आले.
या निवेदनात म्हटले आहे की, जेवळी ते धानुरी दरम्यान गतिरोधक व दिशादर्शक फलक नसल्यामुळे अनेक दुचाकी सह चारचाकी वाहनाचे अपघात होत आहेत तर दुचाकीस्वार यांना रात्रीच्या वेळी दिशादर्शक फलक नसल्यामुळे वळण रस्ता समजत नाही यासाठी तात्काळ दखल घेऊन उपाययोजना करावी. तसेच जेवळी येथील लोहारा वळणापासुन सुरु झालेला जो धानोरी रस्ता आहे त्या रस्त्याच्या मध्ये सय्यद हिप्परगा या गावाकडे जाण्यासाठी वळण आहे. तिथे मागील दोन महिन्यापासून जवळपास चार, पाच अपघात झाले आहेत. त्यामुळे या ठिकाणी तात्काळ गतिरोधक व दिशादर्शक फलक लावण्यात यावेत. याबाबत तात्काळ योग्य ती कार्यवाही करुन वाहनधारक व नागरिकांची गैरसोय दूर करावी व होणाऱ्या अपघातास आळा घालावा अशी मागणी या निवेदनात करण्यात आली आहे. अन्यथा संभाजी ब्रिगेडच्या वतीने आंदोलन करण्यात येईल असा ईशारा देण्यात आला आहे. या निवेदनावर संभाजी ब्रिगेड लोहारा तालुकाध्यक्ष धनराज बिराजदार, तालुका कार्याध्यक्ष बालाजी यादव, उपाध्यक्ष किरण सोनकांबळे,
संघटक प्रणील सुर्यवंशी, पवन चौधरी यांच्या स्वाक्षरी आहेत.
