सध्या गणेशोत्सव सुरू आहे. यात गणेश मंडळांकडून विविध उपक्रम राबविले जात आहेत. परंतु यावर्षीच्या गणेशोत्सवात लोहारा शहरातील किंग कोब्रा गणेश मंडळाकडून एक स्तुत्य उपक्रम हाती घेण्यात आला आहे. या मंडळाच्या आरतीला अनेक मान्यवर येतात. आरतीला येताना जे साहित्य खरेदी करण्यासाठी मान्यवर खर्च करतात. त्या ऐवजी आरतीला येताना एक वही एक पेन घेऊन येण्याचे आवाहन करण्यात आले आहे. या माध्यमातून जे शैक्षणिक साहित्य जमा होईल ते होतकरू, गरजू विद्यार्थ्यांना देण्याचा या मंडळाचा मानस आहे. सामाजिक बांधिलकीच्या नात्याने घेतलेला हा उपक्रम कौतुकास्पद आहे.
लोहारा शहरातील किंग कोब्रा मंडळाने हा उपक्रम राबविला आहे. या उपक्रमाच्या मागील संकल्पना सांगताना मंडळाने सांगितले की, लोकमान्य टिळक यांनी गणेशोत्सव सुरु केला. सर्व जण एकत्र येऊन विचारांची देवाण घेवाण व्हावी आणि यातूनच उज्वल भारत घडावा हा उद्देश होता. पण आजकाल मात्र सर्रास उलट होताना दिसत आहे. आज डी जे, अनावशक्य खर्च टाळून आमचे गणेश मंडळ दरवर्षी विविध सामाजिक उपक्रम राबवित असते. त्यातीलच “एक वही, एक पेन” हा उपक्रम गणेश्याच्या आरतीला आपण विविध मान्यवरांना आमंत्रित करीत असतो. आरतीसाठी येत असताना मान्यवर खूप मोठा खर्च करीत असतात. सध्याची दुष्काळ परिस्थिती पाहता अनेक विद्यार्थ्यांना शैक्षणिक साहित्य उपलब्ध होत नाही. म्हणून आम्ही यावर्षी आरतीचा अनावश्यक खर्च टाळून होतकरू विद्यार्थ्यांसाठी ही नवीन संकल्पना राबवीत आहोत. यातून गणपती दर्शनासाठी येणाऱ्या सर्व मान्यवरांनी, सर्व गणेश भक्तांनी आरतीसाठी खूप मोठा खर्च न करता एक वही आणि एक पेन मंडळाकडे जमा करण्याचे आवाहन आम्ही करीत आहोत. यातून जमा झालेले जे शैक्षणिक साहित्य असेल ते आम्ही गणेश विसर्जना दिवशी किंवा त्यानंतर शाळेतील होतकरू विद्यार्थ्यांना ते देणार आहोत. यातून एक सामाजिक बांधिलकी जपली जाईल. त्याचबरोबर आम्हा सर्वांना एक समाधान, आनंद ही मिळेल आणि या उपक्रमाची निश्चितच इतरही सर्व गणेश मंडळांना प्रेरणा मिळेल हा आमचा छोटासा प्रयत्न असेल.
या उपक्रमातून सामाजिक बांधिलकी जपण्याचा या मंडळाचा प्रयत्न आहे. अशा प्रकारच्या उपक्रमांची खरच गरज आहे. यातून ईतरही गणेश मंडळांनी प्रेरणा घेऊन अशा प्रकारचे उपक्रम राबवावे.
