विद्युतवाहिनी जवळ वीज पडल्याने लोहारा शहरासह १२ गावांचा वीजपुरवठा खंडित – दुरुस्तीच्या कामानंतर वीजपुरवठा झाला सुरळीत

वार्तादूत – डिजिटल न्युज नेटवर्क
उजनी येथून लोहाऱ्याला वीजपुरवठा करणाऱ्या विद्युत वाहिनीच्या जवळ वीज पडल्याने लोहारा शहरासह १२ गावांचा वीजपुरवठा खंडित झाला होता. दुरुस्तीचे काम झाल्यानंतर रात्री ९.५० च्या दरम्यान वीजपुरवठा सुरळीत झाला.
मंगळवारी (दि. १८) सायंकाळी पाचच्या सुमारास मार्डी परिसरात विजांच्या कडकडाटासह जोरदार पावसाने हजेरी लावली. या पावसा दरम्यान उजनी येथून लोहाऱ्याला वीजपुरवठा करणाऱ्या विद्युत वाहिनीच्या परिसरात वीज पडल्याने लोहारा शहरासह १२ गावांचा वीजपुरवठा खंडित झाला. त्यामुळे वीज वितरण कंपनीच्या अधिकारी व कर्मचाऱ्यांनी दुरुस्तीचे काम हाती घेतले. सायंकाळी ५.३० च्या दरम्यान दुरुस्तीचे काम सुरू करण्यात आले होते. लोहारा तालुक्यातील मार्डी ते करजखेडा दरम्यान पोलवरील इन्सुलेटर चेक करून रात्री ९.४५ पर्यंत तीन पोलवरील इन्सुलेटर बदलण्यात आले होते. त्यानंतर वीजपुरवठा सुरू करून चाचणी घेऊन काहीही अडचण आली नाही तर वीजपुरवठा सुरळीत होईल अन्यथा काही अडचण आली तर पुढील उर्वरित पोलवरील इन्सुलेटर चेक करावे लागणार आहे अशी माहिती उपस्थित अधिकारी व कर्मचाऱ्यांनी दिली. यावेळी सहाय्यक अभियंता राम दिक्षित, गौरव मुंडे, अविनाश हालसे, कुणाल अंबिलकर यांच्यासह कर्मचारी सुरेश पवार, नासिर शेख, जावेद शेख, अनिल गुंड, देविदास बोंबले, संतोष उदारे, अजमेर शेख आदी रात्री उशिरापर्यंत दुरुस्तीचे काम करत होते. त्यानंतर ९.५० च्या दरम्यान वीजपुरवठा सुरळीत झाला.