मराठा आरक्षण (Maratha Reservation) प्रश्न ऐरणीवर आला आहे. त्यादृष्टीने मराठा समाज व खुल्या प्रवर्गातील जातीचे सर्वेक्षण करून माहिती गोळा करण्यासाठी प्रशासनाकडून तातडीचे प्रयत्न सुरू केले आहेत. त्या अनुषंगाने लोहारा (Lohara) तहसील कार्यालयात रविवारी (दि. २१) सर्वेक्षणासाठी नेमण्यात आलेल्या प्रगणक, पर्यवक्षकांसह २०० कर्मचाऱ्यांना प्रशिक्षण देण्यात आले. तालुक्यात आजपासून ३१ जानेवारी पर्यंत हे सर्व्हेक्षण (Survey) करण्यात येणार आहे.
मराठा (Maratha) समाजाला आरक्षण देण्यात यावे या मागणीसाठी मागील अनेक महिन्यांपासून जोरदार आंदोलने, उपोषणे केली जात आहेत. मराठा आरक्षणाचा प्रश्न निकाली काढण्याच्या दृष्टीने राज्य सरकारकडूनही प्रयत्न सुरू आहेत. मराठा समाजाचे सामाजिक, आर्थिक, शैक्षणिक मागासलेपण तपासण्यासाठी राज्य मागासवर्ग आयोगामार्फत युद्धपातळीवर सर्वेक्षण करण्यात येणार आहे. त्या अनुषंगाने दि. २३ ते ३१ जानेवारीदरम्यान कालबद्धरीतीने अचूक सर्वेक्षण करण्यात येणार आहे.
त्या अनुषंगाने तालुकास्तरावर सर्वेक्षणासाठी १८८ प्रगणक तर १२ पर्यवेक्षक असे एकूण २०० कर्मचाऱ्यांची नियुक्ती करण्यात आली आहे. तहसील (tahsil) कार्यालयातील सभागृहात रविवारी (दि.२१) तहसीलदार प्रसाद कुलकर्णी यांच्या उपस्थितीत प्रगणक, पर्यवेक्षकांना सर्वेक्षण कशा पद्धतीने करावे याबाबत माहिती देण्यात आली. सकाळ व दुपार अशा दोन सत्रांत या कर्मचाऱ्यांना प्रशिक्षण (Training) देण्यात आले. मंगळवारपासून (दि. २३) तालुक्यात सर्वेक्षण होणार आहे. तहसीलदार, गटविकास अधिकारी, तालुका कृषी अधिकारी, गटशिक्षण अधिकारी आदी सर्वेक्षणाबाबतीत क्षेत्रीय स्तरावर या कामाचे वेळोवेळी भेटी देऊन पर्यवेक्षण करणार आहेत. दि. ३१ जानेवारी पर्यंत हे सर्व्हेक्षण केले जाणार आहे. मराठा समाजाचे सामाजिक, आर्थिक, शैक्षणिक मागासलेपण तपासण्यासाठी सर्वेक्षण अतिशय महत्त्वाचे असून विविध माध्यमांतून लोकांना याविषयी माहिती देत आहोत. सर्वेक्षणा दरम्यान कुटुंबप्रमुखांनी घरी थांबून आपली माहिती प्रगणकांना द्यावी असे आवाहन तहसीलदार प्रसाद कुलकर्णी यांनी केले आहे.
