लोहारा तालुक्यातील हिप्परगा रवा येथे बाल आनंद मेळावा

लोहारा तालुक्यातील हिप्परगा रवा येथील जिल्हा परिषद प्राथमिक शाळेत शनिवारी (दि.१०) बाल आनंद मेळावा घेण्यात आला. यामध्ये पहिली ते सातवीतील विद्यार्थ्यांनी पाणीपुरी, भेळ, इडली, उडीद वडा, समोसा, गुलाब जामुन, सँडविच, गोबी मंचुरियन, शेंगा लाडू, पापड्या, शरबत, फळांचा ज्यूस, मठ्ठा तसेच खरबूज,गाजर इत्यादी फळांचे विविध स्टॉल मांडले होते.
या पदार्थांची विद्यार्थ्यांनी विक्री केली व इतरांच्या पदार्थांची खरेदी केली. या उपक्रमातून विद्यार्थ्यांना व्यवहारिक ज्ञानाची ओळख झाली तसेच व्यवहारातील नफा व तोटा याची माहिती झाली व भविष्यात व्यवसाय कसा करावा याची माहिती विद्यार्थ्यांना मिळाली. या कार्यक्रमासाठी शाळा व्यवस्थापन समितीचे अध्यक्ष अनिल अतनुरे, उपाध्यक्ष अश्विनीताई मोरे, शाळा व्यवस्थापन समिती सदस्य संभाजी मोरे, उत्तम जाधव, ग्रामपंचायत सदस्य सुनील जाधव, रावण कांबळे, नारायण क्षीरसागर, स्वामी रामानंद तीर्थ विद्यालयाचे मुख्याध्यापक संजय भोईटे, मैंदाड, जाधव सर व त्यांचे सर्व विद्यार्थी तसेच गावातील प्रतिष्ठित नागरिक व महिला मोठ्या संख्येने उपस्थित होत्या. उपस्थित सर्वांनी चिमुकल्यांनी बनवलेल्या पदार्थांचा आस्वाद घेतला. या कार्यक्रमाच्या यशस्वीतेसाठी शाळेतील शिक्षक नरेंद्र औटे, हरिदास साळुंके, सुधीर घोडके, संभाजी परीट, मनीषा भोजने यांनी परिश्रम घेतले.