राज्य मागासवर्ग आयोगाचे ( state commission for backward classes) सदस्यांनी गुरुवारी (दि.१३) लोहारा (lohara) तालुक्यातील फनेपुर येथे भेट दिली. यावेळी त्यांनी गवंडी समाजाच्या नागरिकांशी संवाद साधला. तसेच गवंडी समाजाच्या जात सर्वेक्षणाबाबत तहसीलदारांना निर्देश दिले.
राज्य मागासवर्ग आयोगाच्या सदस्यांचा लोहारा तालुक्यात दौरा होता. या दौऱ्यात राज्य मागासवर्ग आयोगाचे सदस्य प्रा. गोविंद काळे, डॉ. मारुती शिकारे हे सहभागी झाले होते. लोहारा तालुक्यातील फनेपुर येथे गुरुवारी (दि. १३) दुपारी एक वाजता अगोगाच्या सदस्यांचे आगमन झाले. यावेळी फनेपुर येथील सभागृहात बैठक घेण्यात आली. या बैठकीसाठी राज्य मागासवर्ग आयोगाचे सदस्य प्रा. गोविंद काळे, डॉ. मारुती शिकारे यांच्यासह तहसीलदार काशिनाथ पाटील, गटविकास अधिकारी शितल खिंडे, विस्तार अधिकारी (पंचायत) जे. पी. वग्गे, मंडळ अधिकारी बी. एस. बरनाळे, श्री. स्वामी, शिवसेना नेते राजेंद्र स्वामी,
सरपंच शोभा सगर, उपसरपंच दत्तात्रय काळे, पोलीस पाटील राजकुमार भोजणे, माजी सरपंच नारायण निंगशेट्टी, फनेपुरचे ग्रामसेवक आनंद राठोड, बेलवाडीचे ग्रामसेवक तानाजी घंटे व ग्रामपंचायत पदाधिकारी, ग्रामस्थ उपस्थित होते. गवंडी समाजाच्या जात सर्वेक्षणाबाबत ग्रामसेवक व तलाठी यांच्या मार्फत सर्वेक्षण करण्यात यावे असे निर्देश राज्य मागासवर्ग आयोगाच्या सदस्यांनी तहसीलदार यांना दिले. यावेळी सदस्यांनी गवंडी समाजबांधवांशी चर्चा केली. बेलवाडी येथील गवंडी समाजाचे बांधव फनेपुर येथील बैठकीत सहभागी झाले होते. फनेपुर येथील बैठक झाल्यानंतर राज्य मागासवर्ग आयोगाचे सदस्य तुळजापूर तालुक्यातील होर्टीकडे मार्गस्थ झाले.
