लोहारा तहसिल कार्यालयात सरपंच आरक्षण सोडत; बेंडकाळ आणि नागराळ सरपंच पद सर्वसाधारण प्रवर्गासाठी

लोहारा तहसिल कार्यालयात बुधवारी ( दि.३१) तालुक्यातील दोन ग्रामपंचायतच्या सरपंच पदाचे आरक्षण सोडत काढण्यात आली. त्यानुसार तालुक्यातील बेंडकाळ, नागराळ या दोन ग्रामपंचायतच्या सरपंच पदाचे आरक्षण हे सर्वसाधारण प्रवर्गासाठी निश्चित झाल्याचे तहसीलदार काशिनाथ पाटील यांनी जाहीर केले.
लोहारा तालुक्यातील डिसेंबर २०२४ अखेर मुदत संपणाऱ्या ग्रामपंचायतच्या सरपंच पदाचे आरक्षण सोडत काढण्यासाठी जिल्हाधिकारी यांनी तहसीलदार यांना प्राधिकृत अधिकारी म्हणून नियुक्ती केली होती. तसेच दि. ३१ जुलैला आरक्षण सोडत काढण्याचे आदेश दिले होते. त्यानुसार लोहारा तहसिल कार्यालयात बुधवारी (दि. ३१) सरपंच पदाच्या आरक्षण सोडतीची बैठक आयोजित करण्यात आली होती. प्राधिकृत अधिकारी तहसीलदार काशिनाथ पाटील यांच्या अध्यक्षतेखाली ही बैठक घेण्यात आली. लोहारा तालुक्यातील बेंडकाळ, नागराळ या दोन ग्रामपंचायतच्या सरपंच पदाची सोडत होती. या दोन्ही ग्रामपंचायतच्या सरपंच पदाचे आरक्षण हे सर्वसाधारण प्रवर्गासाठी निश्चित झाल्याचे तहसीलदार काशिनाथ पाटील यांनी जाहीर केले. यावेळी मंडळ अधिकारी बी. एस. भरनाळे, ग्रामसेवक नेताजी दबडे, डी. एम. कुर्ले, तलाठी एस. एन. गायकवाड यांच्यासह दिपक गोरे, विशाल गोरे, अनिल पवार, अमित देशमुख, महेश गोरे व दोन्ही गावातील नागरिक उपस्थित होते.