लोहारा येथील महाशिवरात्री यात्रा महोत्सवानिमित्त सोमवारी (दि.१६) कुस्तीप्रेमींसाठी कुस्त्यांचा फड आयोजित करण्यात आला होता. अतिशय अटीतटीच्या झालेल्या अंतिम कुस्तीत भुसनी येथील दिपक सगरे याने विजय मिळवला. अंतिम कुस्ती निकाली निघताच कुस्तीप्रेमींनी एकच जल्लोष केला. यात हासेगाववाडी येथील तुकाराम महानूर उपविजेता ठरला. यावेळी कुस्त्या पाहण्यासाठी कुस्ती प्रेमींची मोठ्या संख्येने उपस्थिती होती.
लोहारा शहरात महाशिवरात्री यात्रामहोत्सवानिमित्त मागील तीन दिवसापासून शहरात विविध कार्यक्रम होत आहेत. यात्रामहोत्सव समितीच्या वतीने सोमवारी (दि. १६) भव्य कुस्ती स्पर्धा घेण्यात आली. सायंकाळी साडे पाचच्या सुमारास मान्यवरांच्या हस्ते कुस्ती आखाड्याचे पूजन झाले. यावेळी माजी सरपंच शंकर जट्टे, माजी पंचायत समिती सदस्य चंद्रकांत पाटील, भागवत बनकर, राम जाधव, सुग्रीव रसाळ, महाशिवरात्री यात्रा महोत्सव कमिटीचे अध्यक्ष ओम पाटील, नगरसेवक विजयकुमार ढगे, गोपाळ सुतार, विठ्ठल वचने यांच्या प्रमुख उपस्थितीत कुस्ती स्पर्धेचे उद्घाटन झाले. या कुस्तीच्या आखाड्यात तालुक्यासह इतर जिल्ह्यातील नामवंत मल्ल सहभागी झाले होते. सायंकाळी साडे पाच वाजता सुरू झालेल्या कुस्त्या रात्री साडे दहा वाजता संपल्या. १०० रुपयांपासून २० हजार रुपयांपर्यंतच्या कुस्त्या झाल्या. या दरम्यान लोहारा येथील सद्गुरू कुस्ती संकुलाच्या मल्लांनी उपस्थितांचे लक्ष वेधून घेतले. सदगुरू कुस्ती संकुलाच्या लोहारा येथील शंकर मक्तेदार याने पाच हजार रुपयांची कुस्ती जिंकून उपस्थितांची दाद मिळवली.शेवटची कुस्ती माजी सरपंच शंकर जट्टे, बलभीम रसाळ, चंद्रकांत पाटील यांच्या हस्ते लावण्यात आली.
अंतिम कुस्तीसाठी सहा जणांची नोंदणी झाली होती. त्यामुळे लहान मुलांच्या हस्ते चिठ्ठी काढून लॉट्स पध्दतीने कुस्त्या लावण्यात आल्या. भुसनी येथील दिपक सगरे व हासेगाववाडी येथील तुकाराम महानूर यांच्यात अंतिम कुस्ती झाली. ही कुस्ती जवळपास वीस मिनिटे चालली. अखेर ही कुस्ती दिपक सगरे याने जिंकली. कुस्तीचा निकाल लागताच उपस्थितीतांनी एकच जल्लोष केला. त्यानंतर उपस्थित मान्यवरांच्या हस्ते दिपक सगरे याला जट्टे कुटुंबियांच्या वतीने ३१ तोळे महादेवाची चांदीची पिंड देऊन गौरविण्यात आले. उपविजेता तुकाराम महानूर याचाही सत्कार करून त्याला संजय रसाळ यांच्या ५ हजार रुपये बक्षीस देण्यात आले. यावेळी शंकर जट्टे, चंद्रकांत पाटील, विठ्ठल वचने, श्रीनिवास माळी, महाशिवरात्री यात्रा महोत्सव कमिटीचे अध्यक्ष ओम पाटील, अमोल बिराजदार, गोपाळ सुतार, अभिमान खराडे, दिपक रोडगे, सतिश ढगे, विरेश स्वामी, भीमाशंकर डोकडे, बलभीम रसाळ, प्रभाकर बिराजदार, ईश्वर बिराजदार, हरी लोखंडे, संतोष फावडे, रामेश्वर कार्ले, दयानंद साळुंके, अमित बोराळे आदींसह कुस्तीप्रेमी नागरिक उपस्थित होते. यावेळी पंच म्हणून रामेश्वर कार्ले, दयानंद साळुंके, मोहन वचने, महेश कुंभार यांनी काम पाहीले. यावेळी जवळपास दोनशे मल्लांनी सहभाग नोंदविला.
