लोहारा (Lohara) तालुक्यातील वडगाववाडी व विलासपूर पांढरी गावात गुड मॉर्निंग पथकाने गुरुवारी (दि.१६) उघड्यावर शौच विधी करणाऱ्या ग्रामस्थांना गुलाब पुष्प देवुन त्यांचे प्रबोधन केले.
जल जिवन मिशन प्रकल्प संचालक मनोज राऊत यांच्या मार्गदर्शनाखाली पंचायत समिती स्तरावर ग्रामीण भागातील बांधकाम केलेल्या शोचालयाचा वापर करणे, एक शोषखड्डा असलेल्या शोचलयास दुसरा शोषखड्डा करण्यास भाग पाडणे, सेफ्टी टँक असलेल्या शौचलयास नवीन शोषखड्डा करून त्यास जोडून घेणे या कामास गति देण्यासाठी ग्रामीण भागात गुड मॉर्निंग पथक तयार करण्यात आली आहेत. गुरुवारी (दि.१६) पहाटे पंचायत समितीचे विस्तार अधिकारी पी. एम. गडदे, ग्राम पंचायत अधिकारी आशिष गोरे, डी एम कुर्ले यांनी वडगाववाडी व विलासपूर पांढरी या गावात उघड्यावर शौच विधी करणाऱ्या ग्रामस्थांना गुलाब पुष्प देवुन त्यांचे प्रबोधन केले. तसेच उघड्यावर शौचाला जाऊ नये अन्यथा कार्यवाही केली जाईल असेही सांगितले.
तालुक्यात जिल्हा परिषद गट निहाय गुड मॉर्निंग पथक स्थापन करण्यात आले आहेत. त्यानुसार सरपंच, ग्रामपंचायत अधिकारी, ग्राम पंचायत सदस्य यांनी या कामी पुढाकार घेऊन गावातील सर्व प्रकारच्या शौचालयाचा नियमित वापर करण्यासाठी ग्रामपंचायत स्तरावर कार्यवाही करण्यात येत असून ग्रामीण भागातील उघड्यावर शौच विधी जाणाऱ्यासाठी ग्रामस्थांचे प्रबोधन करण्याचे काम हाती घेण्यात आले आहे. आपल्या गावातील स्वच्छ्ता अबाधित ठेवण्यासाठी तसेच साथीचे आजार पसरू नये साठी गावातील सर्व नागरिकांनी वैयक्तिक तसेच सार्वजनिक शौचालयाचा वापर करावा तसेच जे कुटुंब अद्याप शौचालयापासून वंचित आहेत त्यांनी पंचायत समिती कार्यालयास परिपूर्ण प्रस्ताव सादर करावेत किंवा शासनच्या वेबसाईट वर अर्ज सादर करावा असे आवाहन विस्तार अधिकारी पी. एम. गडदे यांनी यावेळी केले आहे.
