लोहारा तालुक्यातील माकणी (makni) येथील ग्रामदैवत श्री सिद्धेश्वर मंदिरात ग्रंथराज ज्ञानेश्वरी पारायण व अखंड हरिनाम सप्ताहाचे आयोजन करण्यात आले आहे. रविवारी (दि. ८) या सप्ताहास सुरुवात झाली असून दि. १४ रोजी श्री च्या काठीची सवाद्य मिरवणूक व सायंकाळी ५ च्या सुमारास काल्याचा कार्यक्रम होणार आहे.
लोहारा, उमरगा, औसा तालुक्यातील भक्तांचे श्रध्दास्थान असलेले लोहारा तालुक्यातील माकणी येथील ग्रामदैवत श्री सिद्धेश्वर यात्रेनिमित्त दरवर्षी ग्रंथराज ज्ञानेश्वरी पारायण व अखंड हरिनाम सप्ताहाचे आयोजन करण्यात येते. याही वर्षी या सप्ताहाचे आयोजन करण्यात आले असून रविवारी (दि. ८) या सप्ताहास सुरुवात झाली. या सप्ताह कालावधीत पहाटे चार ते सहा काकडा आरती, सकाळी सात ते अकरा ज्ञानेश्वरी पारायण, दुपारी चार ते पाच प्रवचन, पाच ते सहा हरिपाठ तर रात्री नऊ ते साडे अकरा या कालावधीत कीर्तन आदी कार्यक्रम होणार आहेत. या सप्ताहात गुरुवर्य महेश महाराज माकणीकर, गुरुवर्य मठाधीश शामचैतन्य महाराज, विश्वनाथ गर्जे महाराज (माळेगाव), किशोर महाराज (राजखेडकर), नंदकुमार पांचाळ महाराज (हरंगुळ), विठ्ठल गजगे महाराज (परभणी), कृष्णा महाराज चवरे (पंढरपूर ), फुलचंद कांबळे महाराज, दिलीप ताटे महाराज, शेषेराव करदोरे महाराज, प्रभाकर बनसोडे महाराज (उदतपुर), वसंत बोंडगे महाराज (हसलगण) आदी नामवंत कीर्तनकार व प्रवचनकारांचे कीर्तन व प्रवचन होणार आहेत.
दि. १४ डिसेंबर रोजी श्री च्या काठीची सवाद्य मिरवणूक व सायंकाळी ५ च्या सुमारास काल्याचा कार्यक्रम होणार आहे. दरवर्षी दत्त जयंतीनिमित्त ही यात्रा भरवली जाते. या यात्रेचे मुख्य आकर्षण असलेल्या जंगी कुस्त्यांचा फड दि. १५ डिसेंबर रोजी होणार आहेत. शेवटच्या कुस्तीतील विजेत्या मल्लास रु. २१ हजार एक व चांदीची गदा देण्यात येणार आहे. गुरुवर्य विरभद्रप्पा स्वामी शिऊरकर, मठाधिपती शामचैतन्य महाराज माकणीकर व महेश महाराज माकणीकर यांच्या मार्गदर्शनाखाली या सप्ताहातील कार्यक्रम होणार आहेत. या सर्व कार्यक्रमाची ग्रामपंचायत कार्यालय, यात्रा कमिटी व ग्रामस्थाकडून जय्यत तयारी सुरू असून याचा भाविक भक्तांनी लाभ घ्यावा असे आवाहन करण्यात आले आहे.
