क्रीडा संकुलाच्या मागणीसाठी लोहारा तहसिल कार्यालयासमोर स्वराज्य पक्षाच्या वतीने उपोषण सुरू

लोहारा तालुका क्रीडा संकुल लोहारा शहर परिसरातच व्हावे या मागणीसाठी स्वराज्य पक्षाच्या वतीने लोहारा तहसिल कार्यालयासमोर बुधवारी (दि.२०) सकाळपासून आमरण उपोषण सुरू केले आहे.
लोहारा तहसीलदार व गटविकास अधिकारी यांना दिलेल्या निवेदनात म्हटले आहे की, लोहारा तालुक्यात मंजूर असलेले क्रीडा संकुल लोहारा शहरातच नगरपंचायतच्या हद्दीमध्ये आरक्षित असलेल्या जागेत किंवा नव्याने जागा आरक्षित करून किंवा शहराच्या आजूबाजूच्या ग्रामीण भागात गायरान जमिनीमध्ये करण्यात यावे. या मागणीसाठी स्वराज्य पक्ष सातत्याने पाठपुरावा करत असून यापूर्वी देखील स्वराज्य पक्षातर्फे लोहारा शहरातील छत्रपती शिवाजी महाराज चौकात रास्ता रोको आंदोलन करण्यात आले होते. तरीदेखील प्रशासनाला जाग आली नसल्यामुळे स्वराज्य पक्षाच्या माध्यमातून आमरण उपोषणाचा मार्ग स्वीकारला आहे. स्वराज्य पक्षाचे जिल्हा कार्यकारिणी सदस्य महेश गोरे, तालुकाध्यक्ष प्रशांत थोरात, उपाध्यक्ष तानाजी पाटील आदींनी हे उपोषण सुरू केले आहे. विशेष म्हणजे या उपोषणास सायंकाळ पर्यंत एकाही अधिकाऱ्याने भेट दिली नसल्याचे उपोषणकर्त्यांनी सांगितले. या उपोषणास विद्यार्थ्यांसह अनेक संघटना, पदाधिकाऱ्यांनी भेट देऊन पाठिंबा दिला आहे.