निकालानंतर लोहारा शहरात पदाधिकाऱ्यांनी केला जल्लोष

मागील अनेक दिवसांपासून आमदार अपात्रता निकालाकडे सर्वांचे लक्ष लागून राहिले होते. विधानसभा अध्यक्ष राहुल नार्वेकर यांनी बुधवारी (दि.१०) या प्रकरणाचा निकाल दिला असून यात शिंदे गटाचे आमदार पात्र झाल्याचे समजताच लोहारा शहरातील छत्रपती शिवाजी महाराज चौकात फटाके फोडून जल्लोष करण्यात आला.
आमदार अपात्रता प्रकरणाचा निकाल दि. १० जानेवारी ला लागणार असल्याने मागील दोन दिवसांपासून याची सर्वत्र चर्चा सुरू होती. अखेर बुधवारी (दि.१०) दुपारी चार वाजता निकाल वाचनास सुरुवात होणार असल्याने राजकीय पक्षाच्या कार्यकर्त्यांचे या निकालाकडे लक्ष लागून राहिले होते. विधानसभा अध्यक्ष राहुल नार्वेकर यांनी निकाल वाचून दाखवला व शिंदे गटाचे आमदार पात्र राहिल्याने शहरातील पदाधिकारी यांनी छत्रपती शिवाजी महाराज चौकात फटाक्यांची आतिषबाजी व एकमेकांना पेढे भरवत जल्लोष केला. यावेळी अभिमान खराडे, श्रीकांत भरारे, अविनाश माळी, प्रमोद बंगले, ओम कोरे, दिपक रोडगे, अमीन सुंबेकर, आयुब शेख, गौस मोमीन आदी पदाधिकारी उपस्थित होते.