लोहारा येथील शंकरराव जावळे पाटील महाविद्यालयात जागतिक जल दिवस साजरा

लोहारा (lohara) शहरातील शंकरराव जावळे पाटील कला, विज्ञान व वाणिज्य महाविद्यालयात शुक्रवारी (दि.२२) जागतिक जल दिवस (world water day) साजरा करण्यात आला.
महाविद्यालयाचे प्राचार्य डॉ. शेषेराव जावळे यांच्या मार्गदर्शनाखाली हा कार्यक्रम आयोजित करण्यात आला. या दिवसाचे औचित्य साधून भूगोल विभाग व राष्ट्रीय सेवा योजना विभागाच्या वतीने भानुदासराव चव्हाण महाविद्यालयाच्या प्रा. डॉ. महानंदा मोरे यांचे जलसंवर्धन व सांडपाणी व्यवस्थापन या विषयावर व्याख्यानाचे आयोजन करण्यात आले होते. कार्यक्रमाची सुरुवात पृथ्विगोलाचे पूजन मान्यवरांच्या हस्ते करून करण्यात आली. यावेळी बोलताना प्रा. डॉ. महानंदा मोरे यांनी भूजलपातळीत दिवसेंदिवस घट होत चालली असून त्यामुळे पाण्याचे योग्य असे व्यवस्थापन करणे गरजेचे आहे. तसेच घरे व उद्योगधंदे यातील पाण्याचा पुनर्वापर योग्य प्रकारे केला तर पाण्याची बचत होईल व याचा आपल्याला भविष्यकाळात उपयोग होईल असे प्रतिपादन केले. या कार्यक्रमाच्या अध्यक्षस्थानी प्रा. डॉ. सुदर्शन सोनवणे हे होते. यावेळी प्रा. डॉ. पार्वती माने (भूगोल विभाग), रा.से.यो. कार्यक्रमाधिकारी प्रा. डॉ. बालाजी राजोळे, प्रा. भैरवनाथ मोटे , आयक्यूएसी समन्वयक प्रा. डॉ. मनोज सोमवंशी, प्रा. डॉ. प्रभाकर गायकवाड, प्रकाश राठोड यांच्यासह विद्यार्थी मोठ्या संख्येने उपस्थित होते. कार्यक्रमाचे सूत्रसंचालन करून प्रा. डॉ. पार्वती माने यांनी आभार मानले.