वार्तादूत – डिजिटल न्युज नेटवर्क
उमरगा व लोहारा तालुक्यातील कोरोना पॉझिटिव्ह व इतर गरजू रुग्णांना उमरगा येथील जनसेवा गॅस एजन्सीद्वारे ऑक्सिजन गॅस सिलिंडरचा पुरवठा केला जात असून ही एजन्सी उस्मानाबाद जिल्ह्यातील तामलवाडी येथील गोरज गॅसेस कंपनीकडून गॅस रिफिल करून घेते. परंतु गोरज गॅसेस हे अत्यंत कमी क्षमतेचे लिक्विड ऑक्सिजन प्लांट असून सध्याची वाढती रुग्णसंख्या विचारात घेता, उमरगा व लोहारा तालुक्यातील शासकीय व खाजगी (कोविड-19) रुग्णालयांत पुरेशा प्रमाणात गॅस उपलब्ध होत नाही. तसेच पोस्ट कोविड रुग्ण, अतिदक्षता विभागात उपचार घेत असलेल्या (विशेषतः नवजात बालके) यांनाही आवश्यकतेनुसार गॅस पुरवठा करणे जिकिरीचे झाले आहे. यामुळे डॉक्टर्स व रुग्णांना विविध गैरसोयीचा सामना करावा लागत आहे. यामुळे उमरगा येथील जनसेवा गॅस एजन्सीने लातूर येथील गॅस एजन्सीमधून दररोज किमान 50 जम्बो ऑक्सिजन गॅस सिलिंडर रिफिल करून मिळण्यासाठी परवानगी मागितलेली आहे.
तरी उमरगा लोहारा तालुक्यातील रुग्णांच्या सोयीच्या दृष्टीने लातूर येथील एजन्सीकडून ऑक्सिजन गॅस सिलिंडर रिफिल करण्यासाठी परवानगी देणेबाबत मा.जिल्हाधिकारी, लातूर यांना सूचना कराव्यात अशी मागणी आमदार ज्ञानराज चौगुले यांनी अन्न व औषध प्रशासन मंत्री डॉ.राजेंद्र शिंगणे यांच्याकडे पत्राद्वारे केली आहे. या निवेदनाच्या प्रति विभागीय आयुक्त, औरंगाबाद व जिल्हाधिकारी, लातूर यांनाही दिल्या असून जिल्हाधिकारी, उस्मानाबाद यांना सदरविषयी मागणी प्रस्ताव जिल्हाधिकारी, लातूर यांच्याकडे सादर करण्याची विनंती केलेली आहे.
