सास्तूर येथील स्पर्श रुग्णालयात जागतिक क्षयरोग दिन साजरा

“टीबी हरेगा, देश जितेगा” हा विश्वास देत लोहारा तालुक्यातील सास्तुर येथील स्पर्श रुग्णालयात सोमवारी (दि.२४) जागतिक क्षयरोग दिन साजरा करण्यात आला.
तालुक्यातील सास्तुर येथील स्पर्श रुग्णालयात हा कार्यक्रम घेण्यात आला. नियमित उपचार, सकस आहार, योगासने व प्राणायामव्दारे क्षयरोग संपूर्ण बरा होतो व योग्य काळजी घेतल्यास संपूर्ण कुटुंब क्षयरोग पासून मुक्त राहते असे प्रतिपादन प्रकल्प अधिकारी रमाकांत जोशी यांनी यावेळी बोलताना केले. जागतिक क्षयरोग दिनानिमित्त आनम संस्थेच्या सहकार्याने क्षयरोग उपचार घेत असलेल्या ३० रुग्णांना पोषण आहार कीट वाटप करण्यात आले. या कार्यक्रमासाठी प्रकल्प अधिकारी रमाकांत जोशी, स्त्रीरोग तज्ञ डॉ.भक्तराज ठोंबरे, दंतरोग तज्ञ डॉ. संगीता चोरमले यांची प्रमुख उपस्थिती होती.

जिल्हा शल्य चिकित्सक डॉ. धनंजय चाकूरकर, जिल्हा आरोग्य अधिकारी डॉ. सतीश हरिदास, जिल्हा क्षयरोग अधिकारी डॉ. अभिजित बनसोडे यांच्या सूचना व मार्गदर्शनाखाली सास्तूर येथे जागतिक क्षयरोग दिनाचे आयोजन करण्यात आले. जागतिक क्षयरोग दिनानिमित्त रॅलीची सुरुवात प्रकल्प अधिकारी रमाकांत जोशी, स्त्रीरोग तज्ञ डॉ.भक्तराज ठोंबरे, छातीविकार तज्ञ डॉ.अतिफ पटेल, वैद्यकीय अधिकारी डॉ. ऋषिकेश गुंजोटे यांनी हिरवी झेंडी दाखवून रॅलीची सुरुवात केली. होय आपण क्षयरोग निश्चित संपवू शकतो, प्रतिज्ञा करा तरतूद करा सेवा द्या, हे या वर्षाचे क्षयरोगा संबधीचे ब्रिदवाक्य आहे. डॉटसचा अवलंब करूया क्षयरोगावर मात करूया, डॉटस उपचार प्रभावी खरा क्षयरोग करतो हमखास बरा. क्षयरोग उपचार घेतला अर्धवट तर पुन्हा उफाळून येईल क्षयरोगाचे संकट या व अशा इतर घोषणांनी सास्तूर परिसर दुमदुमून गेला. रॅली नंतर क्षयरोग दुरीकरण प्रतिज्ञा घेण्यात आली व क्षयरोगा संबंधी जनजागृती करण्यात आली. तसेच क्षयरोग बद्दल उपस्थिताना संपूर्ण मार्गदर्शन करण्यात आले. “क्षयरोग मुक्त भारत व क्षयरोग मुक्त ग्रामपंचायत हे स्वप्न पूर्ण करण्यासाठी प्रयत्नशील राहण्याची शपथ सर्वांनी घेतली.
जागतिक क्षयरोग दिनाचे औचित्य साधून डॉटस क्षयरोग उपचार चालू असलेल्या ३० रुग्णांना सकस आहारासाठी अन्नधन्य व इतर किटचे वाटप प्रकल्प अधिकारी रमाकांत जोशी व इतर मान्यवरांच्या हस्ते करण्यात आले. या किट मध्ये गहू, तांदुळ, डाळी, साखर, तेल, शेगदाणे, अंगाचे साबण, कपड्याचा साबण, दुध पावडर, चहा पावडर इत्यादी दिले जाते. दिवसभर क्षयरोग संशयित रुग्णांची बेडका तपासणी मायक्रोस्कोप व्दारे तसेच क्ष-किरण तपासणी करण्यात आली. या जागतिक क्षयरोग दिन कार्यक्रमाच्या यशस्वीतेसाठी लोहारा उमरगा एस.टी.एल.एस. ज्ञानेश्वर बिराजदार व एस.टी.एस नागेश ढगे तसेच स्पर्श रुग्णालयाचे सर्व कर्मचारी यांनी परिश्रम घेतले.