लोहारा तालुक्यातील तावशीगड येथे पुण्यश्लोक अहिल्यादेवी होळकर यांची जयंती मोठ्या उत्साहात साजरी करण्यात आली. यावेळी अहिल्यादेवी होळकर यांच्या प्रतिमेचे पूजन करून अभिवादन करण्यात आले.
तालुक्यातील तावशीगड येथे जयंतीनिमित्त आयोजित या कार्यक्रमात ढोल-ताशा पथकाने आकर्षक वादन सादर करून उपस्थितांची मने जिंकली. तसेच दहावी व बारावी परीक्षेत उत्तम गुण मिळवून यश संपादन केलेल्या विद्यार्थ्यांचा पुण्यश्लोक अहिल्यादेवी होळकर मित्र मंडळाच्या वतीने ट्रॉफी देऊन सत्कार करण्यात आला.
या कार्यक्रमासाठी गावातील लहान-थोर नागरिक, महिला भगिनी तसेच युवक मोठ्या संख्येने उपस्थित होते. अहिल्यादेवी होळकर यांच्या प्रतिमेच्या पूजनासाठी मुख्य चौकात मोठी गर्दी झाली होती. चिरका पाटी व तावशीगड परिसरातील नागरिकांनी उत्स्फूर्त सहभाग नोंदविला.
कार्यक्रमास गावचे सरपंच, माजी सरपंच, पंचायत समिती सदस्य, माजी उपसभापती तसेच विविध मान्यवर उपस्थित होते. त्यांच्या हस्ते गुणवंत विद्यार्थ्यांचा सत्कार करण्यात आला.
यावेळी राजपाल पाटील, दत्ता हुडेकर, किशोर हुडेकर, बबन चंडकाळे, नाना चंडकाळे, लक्ष्मण बिराजदार, व्यंकट राजपूत, गजानन मिटकरी, व्यंकट मिटकरी, शांताप्पा मिटकरी यांच्यासह गावातील प्रतिष्ठित नागरिक, मित्रमंडळ उपस्थित होते. पुण्यश्लोक अहिल्यादेवी होळकर मित्र मंडळाच्या सदस्यांनी कार्यक्रमाच्या यशस्वी आयोजनासाठी विशेष परिश्रम घेतले.
