लोहारा येथील वसंतदादा पाटील हायस्कूल संलग्न नेताजी सुभाषचंद्र बोस कनिष्ठ महाविद्यालय व शंकराव जावळे पाटील वरिष्ठ महाविद्यालयात रविवारी (दि.२१) जागतिक योगा दिन साजरा करण्यात आला.
२१ जून हा दिवस संपूर्ण जगात आंतरराष्ट्रीय योग दिन म्हणून साजरा केला जातो. त्यानिमित्ताने सकाळी ७ वाजता शाळा, कनिष्ठ महाविद्यालय, वरिष्ठ महाविद्यालयातील सर्व शिक्षक, शिक्षकेत्तर कर्मचारी व विद्यार्थी यांनी प्राचार्या उर्मिला पाटील यांच्यासह योग दिन साजरा केला. सर्वप्रथम क्रीडाशिक्षक नागनाथ पांढरे यांनी योगासनाचे महत्त्व विद्यार्थ्यांना सांगितले. त्यानंतर ताडासन, वृक्षासन, त्रिकोणासन, दंडासन, वज्रासन, वक्रासन, मकरासन, भुजंगासन, शवाशासन, सेतुबंध सर्वांगासन, अर्धहालासन, पवनमुक्तसन, शवासन इत्यादी योगासने आणि
कपालभाती, अनुलोम विलोम प्राणायाम, भ्रामारी प्राणायाम सर्वांनी मिळून नागनाथ पांढरे यांच्या मार्गदर्शनाखाली केली. यावेळी श्रीकांत मोरे यांनी मयूरासन व प्रा. विजय उंबरे यांनी विद्यार्थ्यांसमोर शीर्षासन सादर केले. प्रा. सचिन शिंदे यांनी आभार मानले. यावेळी शाळा व कनिष्ठ, वरिष्ठ महाविद्यालयातील विद्यार्थी, शिक्षक, शिक्षकेत्तर कर्मचारी उपस्थित होते.
