लोहारा तालुक्यातील बेलवाडी येथील जिल्हा परिषद प्राथमिक शाळेत आंतरराष्ट्रीय योग दिन उत्साहपूर्ण वातावरणात साजरा करण्यात आला. या कार्यक्रमात विकास घोडके यांनी विद्यार्थ्यांना योगाचे महत्त्व, आरोग्यदायी जीवनासाठी योगाची आवश्यकता तसेच नियमित योगाभ्यासाचे फायदे याविषयी सविस्तर मार्गदर्शन केले.
यावेळी विद्यार्थ्यांना विविध योगासने करून दाखविण्यात आली. ताडासन, वृक्षासन, वज्रासन, पद्मासन, भुजंगासन, शलभासन, धनुरासन, पश्चिमोत्तानासन, त्रिकोणासन, पवनमुक्तासन, सर्वांगासन, शवासन, हास्यासन आणि सिंहासन यांसह विविध आसनांचा सराव विद्यार्थ्यांनी उत्साहाने केला. विशेषतः हास्यासन आणि सिंहासन करताना विद्यार्थ्यांचा उत्साह ओसंडून वाहत होता. या आसनांमुळे विद्यार्थ्यांमध्ये आनंदाचे वातावरण निर्माण झाले असून त्यांनी योगाचा मनमुराद आनंद घेतला. सर्व विद्यार्थ्यांनी शिस्तबद्ध पद्धतीने योगासने सादर करत कार्यक्रमात सक्रिय सहभाग नोंदविला. या कार्यक्रमास मुख्याध्यापक राजेंद्र माळवदकर, शिक्षक तानाजी पाटील, राजकुमार क्षीरसागर, सोनाली जगताप यांची प्रमुख उपस्थिती होती. उपस्थित शिक्षकांनी विद्यार्थ्यांना नियमित योगाभ्यास करण्याचे आवाहन केले. या कार्यक्रमाच्या माध्यमातून विद्यार्थ्यांमध्ये योगाविषयी जागरूकता निर्माण झाली असून शारीरिक व मानसिक आरोग्य जपण्यासाठी योगाचे महत्त्व अधोरेखित करण्यात आले. या उपक्रमामुळे शाळेत उत्साहाचे आणि आनंदाचे वातावरण निर्माण झाले.
