उमरगा-लोहारा मतदारसंघाचे लोकप्रिय आमदार प्रविण स्वामी यांनी लोहारा तालुक्यातील जिल्हा परिषद प्राथमिक शाळा, एकोंडी (लो) येथे सदिच्छा भेट देऊन शाळेतील विविध शैक्षणिक उपक्रमांची पाहणी केली.
यावेळी त्यांनी विद्यार्थ्यांची शैक्षणिक गुणवत्ता, संगणक कक्ष, डिजिटल क्लासरूम, ओपन जिम, इनडोअर जिम, आकर्षक परसबाग, बोलक्या भिंती, शालेय रंगरंगोटी, वृक्षारोपण व संवर्धन तसेच विद्यार्थ्यांकडून राबविण्यात येणारे विविध नाविन्यपूर्ण उपक्रम यांची पाहणी करून समाधान व्यक्त केले. अवघ्या दहा महिन्यांत शाळेचा झालेला आमूलाग्र बदल पाहून त्यांनी मुख्याध्यापक व शिक्षकांचे विशेष कौतुक केले. आमदार स्वामी यांनी विद्यार्थ्यांशी संवाद साधत शिक्षण, शिस्त आणि गुणवत्तापूर्ण शिक्षणाचे महत्त्व विशद केले. तसेच नासा परीक्षेत यश मिळविलेल्या रुद्र संदीपान सूर्यवंशी व राणाजगजित प्रविण पाटील या विद्यार्थ्यांचा सत्कार करून त्यांना पुढील वाटचालीसाठी शुभेच्छा दिल्या. यावेळी शाळेच्या वतीने आमदार प्रविण स्वामी यांचा यथोचित सत्कार करण्यात आला.
आपल्या मनोगतात आमदार स्वामी यांनी “मुख्यमंत्री माझी सुंदर शाळा” अभियानांतर्गत शाळेने केलेल्या उल्लेखनीय कार्याचे कौतुक करत, शाळेचे मुख्याध्यापक श्री. डी. एन. आयलाने तसेच शिक्षक श्री. व्ही. आर. सूर्यवंशी, श्री. पी. एस. गुडले, श्रीम. पी. के. येदले आणि श्रीम. एस. ए. मलकलपटे यांच्या परिश्रमांचे अभिनंदन केले. शाळेने अल्पावधीत केलेली प्रगती ही इतर शाळांसाठी प्रेरणादायी असल्याचेही त्यांनी नमूद केले.
या भेटीमुळे शाळेतील विद्यार्थी, शिक्षक, पालक व ग्रामस्थांमध्ये उत्साहाचे वातावरण निर्माण झाले. आमदारांच्या या सदिच्छा भेटीमुळे शाळेच्या गुणवत्तावृद्धीस अधिक बळ मिळणार असल्याची भावना उपस्थितांनी व्यक्त केली. यावेळी गावच्या सरपंच सौ. सुलक्षणाताई सूर्यवंशी, उपसरपंच विकास पाटील, ग्रामविकास अधिकारी महादेव जगताप, प्रविण पाटील, रवी पाटील, बाबा सूर्यवंशी, संदीपान सूर्यवंशी, शिवाजी कांबळे, माधव पाटोळे, संग्राम फटाटे, व मोठ्या संख्येने पालक व ग्रामस्थ उपस्थित होते.
