ठाकरे सरकारच्या योजना सर्वसामान्यांच्या हितासाठीच – आमदार ज्ञानराज चौगुले – उमरगा तालुक्यातील कोराळ येथे शिवसंपर्क अभियानाचा समारोप

वार्तादूत – डिजिटल न्युज नेटवर्क
शिवसेना पक्षप्रमुख तथा मुख्यमंत्री उध्दव ठाकरे यांच्या आदेशानुसार दि.12 जुलै ते 24 जुलै या काळात राज्यभरात शिवसंपर्क अभियान राबविण्यात येत आहे. उमरगा-लोहारा तालुक्यातही हे अभियान व्यापक प्रमाणात राबविण्यात आले असून या अभियानाचा शनिवारी (दि.24) उमरगा तालुक्यातील कोराळ येथून समारोप करण्यात आला. तसेच मुख्यमंत्री उद्धव ठाकरे यांच्या वाढदिवसानिमित्त धाराशिव जिल्हा शिवसेनेच्या वतीने जिल्ह्यात युवा सेनेच्या 51 शाखा स्थापन करण्याचे उद्दिष्ट ठेवण्यात आले होते. त्यानूसार आज कोराळ ता. उमरगा येथे युवा सेनेच्या शाखेची स्थापना करण्यात आली. यावेळी आ. ज्ञानराज चौगुले यांनी उपस्थित पदाधिकारी, शिवसैनिक व नवनिर्वाचित युवा सेना कार्यकारिणी यांना मार्गदर्शन केले. ते म्हणाले की, ठाकरे सरकारच्या सर्व योजना केवळ सर्वसामान्य नागरिकांच्या हिताच्याच असून या अभियानाच्या माध्यमातून शिवसैनिकांनी घरोघरी जाऊन शासनाची कर्जमाफी योजना, कोरोना काळातील कार्य, परवानाधारक रिक्षाचालकांना 1500 रु. अनुदान, गरजूंसाठी शिवभोजन, आदी योजनांची माहिती जनतेपर्यंत पोहचवावी. तसेच लोकांच्या वैयक्तिक व गावागावातील प्रमुख समस्या जाणून घेऊन त्या सोडवण्यासाठी प्रयत्न करावे तसेच वरिष्ठांकडे मांडाव्यात. गावातील किती नागरिकांचे कोरोना लसीकरण झाले आहे याबाबत माहिती संकलित करून जास्तीत जास्त लोकांना लस घेण्यास प्रवृत्त करावे असे आवाहनही यावेळी त्यांनी केले.या कार्यक्रमास युवा नेते किरण गायकवाड, बाजार समितीचे सभापती मोहियोद्दिन सुलतान, शेतकरी सेना तालुकाप्रमुख बलभीम येवते, विधानसभा अध्यक्ष शरद पवार, युवा सेना तालुकाप्रमुख अजित चौधरी, विभागप्रमुख विलास भगत, प्रदीप मदने, विद्यार्थी सेना तालुकाप्रमुख संदीप चौगुले, उपतालुकाप्रमुख संदीप जगताप प्रशांत पोचापुरे, किरण दासमे, बाबू शेख, श्याम माडजे, विक्रम दासमे, अशोक पवार, प्रकाश जंगाले, बालाजी सुरवसे महाराज, धनराज गाडेकर, दत्ता दासमे, दगडू जंगाले आदी शिवसैनिक मोठ्या संख्येने उपस्थित होते.