दहावीच्या परीक्षेचा निकाल कधी जाहीर होणार याकडे विद्यार्थ्यांसह त्यांच्या पालकांचे लक्ष लागले होते. अखेर सोमवारी (दि.२७) दुपारी एक वाजता ऑनलाईन निकाल जाहीर झाला आहे. दहावी परीक्षेचा लोहारा तालुक्याचा निकाल ९४.०४ टक्के लागला आहे.
दहावी परीक्षेचा निकाल जाहीर झाला आहे. लोहारा तालुक्यातील एकूण १४२७ विद्यार्थ्यांनी दहावी बोर्ड परीक्षा दिली होती. त्यापैकी १३४२ विद्यार्थी उत्तीर्ण झाले आहेत. यापैकी विशेष प्राविण्यासह ७४९ विद्यार्थी, प्रथम श्रेणीत ४०३ तर द्वितीय श्रेणीत १६८ विद्यार्थी उत्तीर्ण झाले आहेत. लोहारा तालुक्यातील आठ शाळांचा निकाल १०० टक्के लागला आहे. यामध्ये वसंतदादा पाटील हायस्कुल लोहारा, जिल्हा परिषद हायस्कुल धानुरी, श्री छत्रपती शिवाजी विद्यालय सालेगाव, ज्ञान प्रबोधिनी विद्यालय हराळी, जय हनुमान विद्यालय तोरंबा, शरद पवार विद्यालय राजेगाव, निवासी अपंग शाळा सास्तुर, केंद्रीय अनुसूचित जाती प्राथमिक व माध्यमिक आश्रम शाळा आदींचा समावेश आहे.
लोहारा शहरातील वसंतदादा पाटील हायस्कूलने यावर्षीही यशाची उज्वल परंपरा कायम ठेवली आहे. या शाळेचा निकाल १०० टक्के लागला असून अश्विनी हणमंत रसाळ हीने ९३ टक्के गुण मिळवून प्रथम आली आहे. तर अस्मिता अमोल शिवकर ही ९२.४० टक्के गुण मिळवून द्वितीय आली आहे. तसेच सपना नेताजी भोकरे ९२.०० टक्के गुण मिळवून तृतीय आली आहे. या शाळेतील ६१ विद्यार्थ्यांनी परीक्षा दिली होती. त्यापैकी २९ विद्यार्थी विशेष प्रावीण्यासह उत्तीर्ण झाले असून प्रथम श्रेणी मध्ये २१ विद्यार्थी उत्तीर्ण झाले आहेत. शाळेच्या मुख्याध्यापिका यु. व्ही. पाटील आणि सर्व शिक्षकांनी यशस्वी सर्व विद्यार्थ्यांचे हार्दिक अभिनंदन केले आहे.
तालुक्यातील हिप्परगा (रवा) येथील स्वामी रामानंद तीर्थ विद्यालयाचा निकाल ८७.८० टक्के लागला आहे. या शाळेतील १५ विद्यार्थी विशेष प्राविण्यासह, १३ विद्यार्थी प्रथम श्रेणीत, ६ विद्यार्थी द्वितीय श्रेणीत झाले आहेत. शाळेतील एकूण ४१ विद्यार्थ्यांपैकी ३६ विद्यार्थी उत्तीर्ण झाले आहेत. या शाळेची विद्यार्थिनी श्रुती उमाकांत पाटील हिने ९४.२० टक्के गुण मिळवून प्रथम, हर्षद सतीश मोरे याने ९२.२० टक्के गुण मिळवून द्वितीय तर पूजा चंद्रकांत लोमटे या विद्यार्थिनीने ९० टक्के गुण मिळवून तृतीय क्रमांक मिळवला आहे.
लोहारा शहरातील हायस्कुल लोहारा शाळेचा निकाल ९१.९२ टक्के लागला असून शाळेतील ७० विद्यार्थी विशेष प्रविण्यासह तर ५० विद्यार्थी प्रथम श्रेणीमध्ये उत्तीर्ण झाले आहेत. या शाळेतील विद्यार्थी चप्पू इस्माईल खाजापाशा ९६.८० टक्के गुण मिळवून प्रथम, दिव्या प्रदुमन पाटील ९५.४० टक्के गुण मिळवून द्वितीय तर श्रेया शंकर लोखंडे याने ९५ टक्के गुण मिळवून तृतीय क्रमांक मिळवला आहे. या शाळेतील २० विद्यार्थ्यांनी ९० टक्के पेक्षा जास्त गुण घेऊन उत्तीर्ण झाले आहेत.
