जिल्हा परिषद धाराशिव व ओपन लिंक फाउंडेशन यांच्यातील सामंजस्य करार अंतर्गत राबविण्यात येणारा आचार्य विनोबा भावे शिक्षक सहाय्यक कार्यक्रम अर्थात विनोबा (बा) ॲपच्या माध्यमातून जिल्ह्यातील उपक्रमशील शिक्षकांना प्रत्येक महिन्यात प्रोत्साहनपर पुरस्कार देऊन सन्मानित करण्यात येते. शिक्षक मल्लिकार्जुन कलशेट्टी यांना हा पुरस्कार देऊन गौरविण्यात आले आहे.
डिसेंबर महिन्यात धाराशिव जिल्ह्यातील लोहारा तालुका स्तरावरील ‘पोस्ट ऑफ द मंथ’ विजेते शिक्षक लोहारा तालुक्यातील बेलवाडी येथील मल्लिकार्जुन कलशेट्टी यांना पुरस्कार देऊन सन्मानित करण्यात आले. सदरील पुरस्कार गटशिक्षणाधिकारी सुभाष चव्हाण यांच्या हस्ते प्रदान करण्यात आला. या कार्यक्रमाला जनार्धन काठमोडे, इतर शिक्षक, कर्मचारी व आचार्य विनोबा भावे शिक्षक सहाय्यक प्रशिक्षण कार्यक्रमाचे प्रकल्प अधिकारी सोमनाथ स्वामी उपस्थित होते. गटशिक्षणाधिकारी सुभाष चव्हाण यांनी पुढील कार्यास सर्व शिक्षक यांना शुभेच्छा दिल्या व तालुक्यातील सर्व शिक्षकांना प्रेरणा द्यावी अशी अपेक्षा त्यांनी यावेळी व्यक्त केली.
