लोहारा तालुक्यातील होळी येथील जिल्हा परिषद प्राथमिक शाळेत प्रजासत्ताक दिन साजरा करण्यात आला.
सुरुवातीला शालेय समितीच्या अध्यक्षा उषाताई चव्हाण व सरपंच सरोजा बिराजदार यांच्या हस्ते प्रतिमा पूजन करण्यात आले. मुख्याध्यापक देविदास पावशेरे यांच्या हस्ते ध्वजारोहण कार्यक्रम संपन्न झाला. यानंतर प्रजासत्ताक दिनानिमित्त घेण्यात आलेल्या विविध क्रिडा, वक्तृत्व स्पर्धेचे बक्षीस वितरण प्रमुख मान्यवरांच्या हस्ते करण्यात आले. या कार्यक्रमाचे अध्यक्षस्थानी शाळा व्यवस्थापन समितीच्या अध्यक्षा उषा चव्हाण होत्या. प्रास्ताविकामध्ये मुख्याध्यापक देविदास पावशेरे यांनी शाळेच्या प्रगती व उपक्रमाबाबत आढावा सादर केला. सरपंच सरोजा बिराजदार यांच्या वतीने वक्तृत्व व क्रिडा स्पर्धांचे बक्षीस वितरण रोख आणि शैक्षणिक साहित्य देऊन करण्यात आले. वक्तृत्व स्पर्धेस बक्षीस सरोजा बिराजदार यांनी प्रथम ( रु. एक हजार), उपाध्यक्ष विनोद गायकवाड यांच्या वतीने द्वितीय (रु. ५००/-) चे पारितोषिक तर शाळेकडून तृतीय (रु. २००/-) बक्षीस ठेवण्यात आले होते. शाळेतील विद्यार्थी शंकर जाधव यांने प्रथम, प्रबुद्ध गायकवाड याने द्वितीय तर आरुषा राठोड यांनी तृतीय पारितोषिक पटकाविले. वक्तृत्व स्पर्धांचे परीक्षण चंद्रहर्ष जाधव यांनी केले. यावेळी ग्रा.पं.सदस्य, समिती सदस्य, तसेच गावातील आजी, माजी प्रमुख पदाधिकारी, युवक महिला, विद्यार्थी, शिक्षक उपस्थित होते. सतीश माळी यांनी आभार मानले.
