लोहारा तालुक्यातील हिप्परगा (सय्यद) व वडगाववाडी येथे झेप किशोरी विकास प्रकल्पांतर्गत गरजू मुलींना शिलाई मशीन, सायकल, शेळ्या व शैक्षणिक साहित्याचे वाटप करण्यात आले.
हॅलो मेडिकल फाउंडेशन, अणदूर व स्विसएड संस्थेच्या संयुक्त विद्यमाने राबविण्यात येणारा झेप किशोरी विकास प्रकल्प जून २०२५ पासून लोहारा व तुळजापूर तालुक्यातील ३० गावांमध्ये कार्यरत आहे. १३ ते १७ वयोगटातील मुलींच्या लिंगभाव दृष्टिकोनात सकारात्मक बदल घडवून आणणे, निर्णयक्षमता वाढवणे, जीवन कौशल्ये विकसित करणे तसेच बालविवाह रोखण्यासाठी मुलींना सक्षम बनवणे हा या प्रकल्पाचा मुख्य उद्देश आहे. यासाठी पालक, युवक व शासकीय यंत्रणांचा सहभाग वाढवून जबाबदारीची जाणीव निर्माण करण्याचे काम प्रकल्पामार्फत केले जात आहे. प्रकल्पांतर्गत गावपातळीवरील सखींच्या माध्यमातून विविध उपक्रम राबविले जात असून गरजू व असुरक्षित मुलींना शिक्षणाच्या प्रवाहात कायम ठेवण्यासाठी उत्पन्नवाढीची साधने उपलब्ध करून दिली जात आहेत. याअंतर्गत लोहारा तालुक्यातील हिप्परगा (सय्यद) व वडगाववाडी येथे शेळ्या, शिलाई मशीन, सायकल व शैक्षणिक साहित्याचे वाटप करण्यात आले.
हिप्परगा (सय्यद) येथील चार मुलींना शेळ्या व एका मुलीला शिलाई मशीन देण्यात आले. तर वडगाववाडी येथील एका मुलीला शेळी तसेच तीन मुलींना सायकल व शैक्षणिक साहित्याचे वितरण करण्यात आले. या मदतीमुळे मुलींचे शिक्षण सुरू राहण्यास व त्यांच्या कुटुंबाच्या उत्पन्नात वाढ होण्यास मदत होणार आहे. या कार्यक्रमासाठी स्विसएड संस्थेच्या स्नेहा गिरिधारी, प्रकल्प अधिकारी जितेंद्र सावकर, हॅलो मेडिकल फाउंडेशनच्या अध्यक्षा डॉ. शुभांगी अहंकारी, प्रकल्प संचालक डॉ. क्रांती रायमाने, प्रकल्प समन्वयक नागिनी सुरवसे, किशोरी सहाय्य समितीचे सदस्य दिनकर गाढवे व जावेद शेख, प्रकल्प अकाउंटंट मुन्नाबी इनामदार, डाटा कलेक्टर मिराज नदाफ तसेच पर्यवेक्षिका रत्नमाला खरोसे, सुमती कानडे, शीला भोजने, पल्लवी गायकवाड, वडगाववाडी येथील सखी हसीना शेख व सय्यद हिप्परगा येथील सखी शबनम कारभारी यांनी सहकार्य केले. यावेळी सय्यद हिप्परगा व वडगाववाडी येथील ग्रामपंचायत अधिकारी आशिष गोरे, प्रतिष्ठित नागरिक श्रीशैल ओवांडे, अंगणवाडी कार्यकर्त्या हसीना कारभारी, सरपंच सोनाली गाडेकर, अनिता गिराम व सुरेखा गिराम उपस्थित होत्या.
कार्यक्रमाच्या शेवटी दोन्ही गावांतील मुलींच्या वतीने ग्रामपंचायत अधिकारी आशिष गोरे यांनी झेप किशोरी विकास प्रकल्पाच्या कार्याचे विशेष कौतुक करून संस्थेचे व प्रकल्पाशी संबंधित सर्वांचे आभार मानले.
