ज्ञान प्रबोधिनी क्रीडाकुल आणि टाटा ट्रस्ट यांच्या संयुक्त विद्यमाने सुरू करण्यात येत असलेल्या \’क्रिडाकुल ग्रामीण खेळाडू विकास\’ प्रकल्पाचा शुभारंभ कार्यक्रम गुरुवारी (दि. ८) तालुक्यातील हराळी येथील ज्ञान प्रबोधिनी येथे क्रीडा क्षेत्रातील मान्यवरांच्या उपस्थितीत पार पडला.
या कार्यक्रमासाठी टाटा ट्रस्टच्या क्रीडा विभागप्रमुख श्रीमती नीलम बाबर देसाई आणि ज्ञान प्रबोधिनी क्रीडाकुलचे संचालक मनोजराव देवळेकर यांची प्रमुख उपस्थिती होती. ग्रामीण भागांतील मुलांना योग्य संधी आणि दिशा मिळाल्यास ऑलिंपिक मध्ये पदक मिळवण्याचे स्वप्नही ते पूर्ण करतील असा विश्वास यावेळी बोलताना दोघांनी व्यक्त केला. ग्रामीण भागातील मुलांना शालेय वयापासून खेळासाठी प्रोत्साहन आणि शास्त्रशुद्ध मार्गदर्शन मिळावे या उद्देशाने हा प्रकल्प सुरू करण्यात येत आहे. लोहारा तालुक्यातील धानुरी, तावशीगड, हिप्परगा, दक्षिण जेवळी, शिवनगर व नरखोरी तांडा अशा सहा ठिकाणी या वर्षी हा प्रकल्प घेतला जाणार आहे. स्थानिक युवक-युवतींना प्रशिक्षण देऊन त्यांना गावात प्रशिक्षक म्हणून नेमण्यात आले आहे. तसेच मुलाच्या शारीरिक व मानसिक आरोग्याची काळजी घेण्यासाठी तज्ञ डॉक्टर आणि समुपदेशकही नेमण्यात आले आहेत. या कार्यक्रमासाठी लोहारा तालुका क्रीडा सचिव मुकेश सोमवंशी, ॲथलेटिक्स संघटनेचे सचिव योगेश थोरबोले यांच्यासह अनेक मान्यवर उपस्थित होते. या कार्यक्रमासाठी सहा गावातील ८० मुलेही आली होती. प्रकल्प समन्वयक संतोष राठोड यांनी कार्यक्रमाचे सूत्रसंचालन केले.
