लोहारा तालुक्यातील मार्डी येथील जिल्हा परिषद प्राथमिक शाळेच्या शालेय व्यवस्थापन समितीची निवड करण्यात आली. यावेळी शालेय व्यवस्थापन समितीच्या अध्यक्षपदी योगेश देवकर तर उपाध्यक्षपदी रमेश कदम यांची निवड करण्यात आली.
शाळेच्या शैक्षणिक व भौतिक विकासामध्ये शालेय व्यवस्थापन समितीची भूमिका अत्यंत महत्त्वाची असते. विद्यार्थ्यांना दर्जेदार शिक्षण मिळावे, शाळेतील शैक्षणिक वातावरण अधिक आनंददायी व गुणवत्तापूर्ण व्हावे, तसेच विद्यार्थ्यांच्या सर्वांगीण विकासासाठी आवश्यक सुविधा उपलब्ध व्हाव्यात यासाठी समितीच्या माध्यमातून प्रभावीपणे काम करण्याचा निर्धार यावेळी व्यक्त करण्यात आला. यावेळी शासनाच्या निकषाप्रमाणे समितीची निवड करण्यात आली. नवनिर्वाचित अध्यक्ष योगेश देवकर व उपाध्यक्ष रमेश कदम यांचे उपस्थित मान्यवर, शिक्षक, पालक व ग्रामस्थांच्या वतीने पुष्पहार व पुष्पगुच्छ देऊन अभिनंदन करण्यात आले. विद्यार्थ्यांनीही टाळ्यांच्या कडकडाटात नवनिर्वाचित पदाधिकाऱ्यांचे स्वागत केले. यावेळी तंटामुक्त समितीचे अध्यक्ष अप्पासाहेब पाटील, माजी सरपंच अण्णासाहेब पाटील, जिल्हा परिषद प्राथमिक शाळा मार्डीचे मुख्याध्यापक सुरेश वाघमोडे, माजी अध्यक्ष नूर पठाण शिक्षक, शालेय व्यवस्थापन समितीचे सदस्य तसेच पालक उपस्थित होते.
नवनिर्वाचित अध्यक्ष योगेश देवकर यांनी शाळेच्या विकासासाठी शिक्षक, पालक, ग्रामस्थ आणि शालेय व्यवस्थापन समिती यांच्यात समन्वय ठेवून काम करण्याचे आश्वासन दिले. विद्यार्थ्यांच्या गुणवत्तावाढीसोबतच शाळेच्या आवश्यक सुविधा, स्वच्छता, शैक्षणिक उपक्रम आणि विद्यार्थ्यांच्या सर्वांगीण विकासाला प्राधान्य देण्यात येईल असे त्यांनी सांगितले. शाळा ही गावाच्या भविष्याची पायाभरणी करणारी संस्था असून, विद्यार्थ्यांच्या उज्ज्वल भविष्यासाठी सर्वांनी एकत्रितपणे काम करणे हीच काळाची गरज आहे अशी अपेक्षा यावेळी उपस्थितांमधून व्यक्त करण्यात आली. नवनिर्वाचित अध्यक्ष व उपाध्यक्षांचे सर्व स्तरातून अभिनंदन होत असून त्यांच्या निवडीमुळे शाळेच्या विकासाला निश्चितच नवी दिशा मिळेल अशी अपेक्षा पालक व ग्रामस्थांनी व्यक्त केली. शिक्षिका व्ही. के. चौधरी, एम. एल. चव्हाण, के. एस. माणिकशेट्टी, वाय. एस. बनकर, आर. डी. खटके यांनी निवड प्रक्रिया यशस्वीतेसाठी प्रयत्न केले.
