लोहारा नगरपंचायतच्या खतनिर्मिती प्रकल्पातून चोरी झालेल्या खत चोरी प्रकरणी चौकशी समितीचा अहवाल येऊन सुद्धा दोषींवर कारवाई झाली नाही म्हणून लोहारा नगरपंचायत कार्यालयासमोर नगरसेवक प्रशांत काळे यांनी गुरुवारी (दि.१३) उपोषण सुरू केले आहे.
लोहारा नगरपंचायतच्या खतनिर्मिती प्रकल्पातून खत चोरीप्रकरणी वेळोवेळी अनेकांनी उपोषण, आंदोलन केले होते. त्यानंतर चौकशी समिती नियुक्त करून सदरील समितीमार्फत चौकशी करण्यात आली होती. या समितीचा अहवाल येऊनही अद्याप कारवाई करण्यात आली नसल्याने गुरुवार (दि.१३) पासून उपोषण सुरू केल्याचे नगरसेवक प्रशांत काळे यांनी सांगितले. याबाबत नगरसेवक प्रशांत काळे यांनी दि. ७ ऑगस्ट रोजी निवेदन दिले होते. जनहिताच्या विविध प्रश्नांसंदर्भात आजपर्यंत नगरपंचायतीकडे सुमारे १० लेखी तक्रारी व अर्ज सादर केले आहेत. मात्र, आजपर्यंत कोणत्याही तक्रारीवर लेखी उत्तर देण्यात आलेले नाही किंवा त्यावर झालेल्या कार्यवाहीची माहितीही देण्यात आलेली नाही. ही बाब लोकशाही मूल्यांच्या तसेच नागरिकांच्या माहितीच्या अधिकाराच्या विरोधात आहे. वारंवार पाठपुरावा करूनही प्रशासनाकडून कोणताही प्रतिसाद मिळत नसल्याने माझ्याकडे लोकशाही मार्गाने आंदोलन करण्याशिवाय दुसरा पर्याय उरलेला नाही. त्यामुळे माझ्या प्रलंबित तक्रारींवर तात्काळ लेखी उत्तर देऊन आवश्यक कार्यवाही करावी. अन्यथा दि.१३ ऑगस्ट पासून नगरपंचायत कार्यालयासमोर बेमुदत उपोषण सुरू करणार असा ईशारा या निवेदनात दिला होता. त्यानुसार हे उपोषण करत असल्याचे नगरसेवक प्रशांत काळे यांनी सांगितले. या प्रकरणी यापूर्वी अनेक वेळा उपोषण, विविध आंदोलने झाली आहेत. तरीही प्रशासनाकडून कारवाई का केली जात नाही. चौकशी समितीने अहवाल देऊनही दोषींवर कारवाई होण्यासाठी एवढी दिरंगाई का ? असा सवाल नागरिकांतून विचारला जात आहे. या प्रकरणी काय कारवाई होणार याकडे नागरिकांचे लक्ष लागले आहे.
Tuesday, October 6, 2026
